Sabuli 30 - Baibuli I Leb Kumam 2013

Ilega me Mino Pwoc

¹ Ango apaki Rwot pien in ilaka, di iko gengo jokwor na lelo i wia.

² Okwe Rwot Rubanga na, ango oudo akok buti pi konya, di iko canga.

³ Okwe Rwot, in ilako kuo na ki kabedo me jo oto, idwoka i kuo kikom jo kame oudo tie donyo i bur atut me to.

⁴ Werunu wer me pako Rwot wun jo mege agenere; pakenu piento en ebedo ngat kacil.

⁵ Pien gero mere bedo pi kare acecek kenekene; do bero mere bedo pi kare lung me kuo. Aromo kok iwor, do odiko ako bino bedo kede yomcuny.

⁶ I kare kame gi dedede oudo tie na kede kiber oudo awaco be, “Likame tie gikame bino yanga.”

⁷ Rwot, pi bero ni, omio iko mina acungo di atek bala moru atek; do i kare kame ipwono na kede, lworo oko maka.

⁸ Ango oudo akok buti, Rwot, abako ni doga di akwao be:

⁹ “Bero nyo kame in itwero udo ki to nango, ka ango adonyo piny i bur me to? Iparo be apua me lobo bino paki, arabo tatamo be in igenere?

¹⁰ Rwot, winy koko na, iko mino kisa maki i koma. Okwe Rwot, bed ngakony na!”

¹¹ In itieko loko iturur na odoko miel; in igonyo egoe na me iturur iko ngapa kede kilel,

¹² tetekeny abed paki i kuo na abongo ling. Okwe Rwot Rubanga na, abino mini pwoc nakanaka.