Sabuli 27 - Baibuli I Leb Kumam 2013

Ilega me Pak

¹ Rwot en lero kede ngat kame laka; abino do lworo ngai? Rwot en kateko kame gwoko kuo na; abino lworo do ngai?

² Ka jo areco osura di kimito muducaro ango, gin jo kame kibedo jokwor kede joading na, gin kibino gete kiko popoto.

³ Akadi di isirikalen olukaro ango, cunya likame bino bedo lwor; akadi di jo ocako yi keda, do ango abino geno Rwot.

⁴ Tie gi acel kame ango akwao Rwot; gi acel nono en kame ango amo; en bedo i ot ka Rwot i kare lung me kuo na, pi bedo neno bero ka Rwot, di akwae i tempulo mere pi tela.

⁵ Piento en ebino kana i ode i kare me peko; en ebino uma kede eema mere, di eko bino keta kakabor i wi moru.

⁶ Nan ango alelo i wi jokwor na dedede kame olukaro ango, doko abino mino giayala but Rwot kede ilel i tempulo mere; abino wero wer amit me pako Rwot.

⁷ Okwe Rwot, winy koko na kame akok kede buti; mi kisa maki i koma iko gamo doga.

⁸ Cunya waco na be, “Bia, moi wange.” Okwe Rwot, abino mono wangi,

⁹ kur ilok wangi tenge kibuta! Kur iriama kede gero, ango ngatic nin, in en kame lem ibedo konya; kur iweka, kur ijala, Okwe Rubanga in ngat kame laka.

¹⁰ Ka papa na kede toto na oweka, Rwot bino gama.

¹¹ Pwonya lubo yongayo nin, Okwe Rwot, di iko tela lubo yongayo aber pien atie kede jokwor.

¹² Kur ijala i cing jokwor na, pien ijurak me angalo owokun kede kop me abe i koma, doko kitie waco na kope me gero.

¹³ Ango ayei be abino neno bero ka Rwot, i lobo me jo akuo.

¹⁴ Bed kede gen i kom Rwot, bed tek, wek cunyi bed nwang, bed kede gen i kom Rwot.