Sabuli 24 - Baibuli I Leb Kumam 2013

Abaka Adwong

¹ Lobo obedo me ka Rwot kede gi dedede kame tie iye; piny kede jo kame bedo iye obedo mere.

² En ecibo lobo i wi nam adwong, acakini mere cungo i icileta.

³ Ngai kame twero yito malo i wi moru ka Rwot? Doko ngai kame twero cungo i kabedo mere kacil?

⁴ Gin jo kame cing gi kede cuny gi cil, jo kalikame keto cuny gi i angalo, kede kalikame lairo i kop me abe.

⁵ Gin kibino udo winyo kibut Rwot, doko Rubanga ngat kame lako gi bino waco be kili kede raco.

⁶ Magonogo en jo kame moe, gin en jo kame mo wang Rubanga ka Yakobo.

⁷ Yabunu irutei, yabunu ikekon asek da, tetekeny Abaka me deyo donyi.

⁸ Ngai en Abaka me deyo noni? En ebedo Rwot ngateko kede won twer, en Rwot kame lo yi.

⁹ Yabunu irutei, yabunu ikekon asek da, tetekeny Abaka me deyo donyi.

¹⁰ Ngai en Abaka me deyo noni? En ebedo Rwot me jo yi, en Abaka me deyo.