Sabuli 23 - Baibuli I Leb Kumam 2013

Rwot en Ngakwat na

¹ Rwot en Ngakwat na; likame abino rem kede gimoro.

² En emia abuto i lum alibaliba, di eko tela ot i pii kopiei.

³ En emio kuo na doko nyen bobo. En etela lubo yote kopoore pien nyinge ber.

⁴ Akadi bed bala atie beo ki aditot moro acol cucucuc, likame abino lworo gimoro arac, pien udo in itie keda. Akuta nin me kwat kede ebela ni dio cunya.

⁵ In itemuno emesa me cam i nyima, di jokwor na da tie kanono; in iwiro wia kede mo, di iko pongo ikopo na lubulub.

⁶ Ateteni bero kede mwolo nin bino bedo keda ceng dedede me kuo na, doko abino bedo i ot ka Rwot i kare me kuo na lung.