Sabuli 22 - Baibuli I Leb Kumam 2013

Koko me Cwercuny kede Wer me Pako Rubanga

¹ Rubanga na, Rubanga na, pinyo komio ijala? Pinyo komio ibedo kakabor keda, omio likame itwero konya akadi winyo cur na?

² Okwe Rubanga na, akok iceng do likame iromo gamo doga; akok iwor da do likame aromo udo wei.

³ Do di in ibedo Ngat Kacil, in ibedo i kom ni me ajakanut di jo me Isirael paki.

⁴ Joakwari wa bin obedo kede gen buti, gin kibedo kede gen di in iko lako gi.

⁵ Gin kikok buti di in iko lako gi; gin kiketo gen gi buti di likame oko mino gi lewic.

⁶ Do ango acal bala kudiling do weko dano; jo tie kede acae buta, doko kidaga.

⁷ Jo dedede kame nena nywara anywara; kijunyo na dog gi di kiyayango wi gi.

⁸ Gin kiwaco be, “En egeno Rwot, wek Rwot konye; wek Rwot lak ngat kame yomo cunye.”

⁹ Aso di in en kame iwota ki yi toto na, igwoka i kor toto na di pwodi adot.

¹⁰ Cako nywala, ango ajalere buti, doko cako toto na nywala, in ibedo Rubanga na.

¹¹ Kur ibed bor keda, pien peko onoka, doko likame tie ngatamoro kame bino konya.

¹² Jokwor atot oluka bala twonin, twonin atek me Basan oluka.

¹³ Kingamo na dog gi di lac, bala engu ager pi kec di edorano.

¹⁴ Teko na tie tiek bala pii kame kotie onyo. Cogere na otieko gwegwetun ki kariamo gi; cunya do cal bala odok kame ocalar i kora.

¹⁵ Dwana otuo bala yat kotuo; leba omoko i dana. Ipiela i apua i kabedo me jo oto.

¹⁶ Jo olukaro ango bala igwogin; ekodet me jo atimo tim areco oluka diere, ineno bala kimito nyinyilo cinga kede tiena.

¹⁷ Atwero maro cogere dedede me koma; kipedo wang gi ngina di kilelo i wia.

¹⁸ Kipopoko igoen na i diere gi; kiuco alulu pi popoko giangapa na.

¹⁹ Do in, Rwot, kur ibed bor tenge! Okwe ngakony na, susunyo bino konya.

²⁰ Lak kuo na ki epima; lak kuo na acel kenekene ki twer me igwogin nogi.

²¹ Laka ki dog engu! In itieko laka ki tung twonin ager nogi.

²² Ango abino sarakino nyingi but imiegu kede amiegu na; abino paki i diere me jo kocokere wori.

²³ Wun jo kame tie kede wor but Rubanga, pakenu! Wun dedede ikwae ka Yakobo, mienu deyo; wun dedede ikwae me Isirael bedunu kede wor bute.

²⁴ Pien likame en edagi arabo ecao peko me jo kame tie neno can; likame en eloko wange tenge kibut gi, do en egamo koko gi.

²⁵ Abino paki i dier jo ocokere; abino cobo i nyim jo kame wori gikame alairo pi timo.

²⁶ Jocan bino cam di kiko yeng; jo kame mo Rwot bino pake. Akwao be ibedunu kede kuo aber nakanaka.

²⁷ Wi lobo lung bino yutuno Rwot di kiko lokere bute; jo me atekerin dedede bino wore.

²⁸ Pien twer me pug obedo me ka Rwot; en epugo atekerin dedede.

²⁹ Ateteni jo awakere dedede me wi lobo bino luro i nyime; jo dedede kotieko to oko dok i apua bino riebere i nyime, di ango ako bino kuo pire.

³⁰ Ikwae me anyim bino tic ne; kobino tuco nying Rwot ne lwak me kare me anyim.

³¹ Kobino waru waco ne jo kalikame nan pwodi konywalo be, “Rwot ocobo tic mere me lako jo mege.”