Sabuli 21 - Baibuli I Leb Kumam 2013

Pako Rubanga pi Bwono Jokwor

¹ Okwe Rwot, abaka lelo pi teko kame in imie; cunye yom nadi piento in imie kony!

² In itieko mine gikame cunye mito, doko likame idagi gamo kwac me doge.

³ Pien in ibino bute kede twon winyo, iko ngapo ne ocoro me dwongo kame kotimo kede saabu.

⁴ En ekwai pi mine kuo, in iko mine da; imie kuo kame bor nakanaka.

⁵ Deyo mere dwong pi kony kame imie; in imie angosibib kede dwongo.

⁶ In imie winyo kame bedo nakanaka, cunye yom pien in itie kede en.

⁷ Pien abaka keto gen mere i kom Rwot; pi amara kalikame lokere kame Ngamalo Twal tie kede i kome, likame gimoro bino yange.

⁸ Cingi bino mako jokwor ni dedede; cingi tetu cam bino mako jo adagi.

⁹ Ibino loko gi kidoko bala keno kodop i kare kame ibino neeno kede. Gero ka Rwot bino muducaro gi, mac bino wango gi dopodop.

¹⁰ In ibino muducaro ikwae gi dedede i wi lobo, karacel kede idwe gi i diere me jo.

¹¹ Ka gin kitimo iik arac i komi, akadi ka kitimo iik me timo ni can, iik gi nono likame bino cobere.

¹² Pien in ibino mino gi kiringo; in ibino pimo nyim gi kede tong me emal ni.

¹³ Rwot, wan opaki pi twon teko nin, wan obino wer di opako twer nin.