Sabuli 20 - Baibuli I Leb Kumam 2013

Ilega pi Lono Yi

¹ Akwao Rwot konyi i kare me peko! Rubanga ka Yakobo gwoki!

² Akwae ecwai ni kony ki kabedo mere kacil, doko emii kony kame wok ki Sion.

³ Akwae eyutuno giamia ni dedede doko cunye bed yom pi giayala ni me awanga.

⁴ Akwae emii gikame cunyi mito, doko emi iik ni dedede cobere.

⁵ Di do wan oko bino lelemo kede yomcuny pien in ilo yi, di oko kiarao imenderan wa malo i nying Rubanga wa. Akwao Rwot emii gi dedede kame ikwao.

⁶ Nataman do ango angeo be Rwot bino konyo abaka kame en eyero; en ebino gamo kwac mere ki malo mere kacil di emie loc adwong pi twer mere.

⁷ Jo mogo wakere pi cabalan, mogo pi asigiran, do wan owakere pi Rwot Rubanga wa.

⁸ Gin kibino gete di kiko poto, do wan obino yai malo di oko cungo di otek.

⁹ Okwe Rwot, kony abaka, mie eloi yi; winy wa kame olwongere buti.