Sabuli 19 - Baibuli I Leb Kumam 2013

Deyo ka Rubanga Nyutere i Cwec mere

¹ Malo nyuto deyo ka Rubanga; doko etatamo gikame en ecweo.

² Ceng acelacel tatamo ne ceng kame lubo, iwor acelacel da tatamo ne iwor kame lube.

³ Gin likame kiyamo, doko kope kame kiyamo da li; dwan gi likame winyere;

⁴ do di gikame gin kiwaco winyere i kabedere dedede, kope gi romo piny lung. Rubanga otimo ne ceng kima i malo;

⁵ en ewok bala eteran koyai ki kanyom, di eko ringo lubo yongayo mere di elelo bala ngaringo me elagano.

⁶ En ewok ki malo tetucel, di eko ot paka tetuca mere; likame tie gikame karuno pwono ne lieto mere.

Iswil ka Rwot

⁷ Iswil ka Rwot tie kakare, edwoko cuny dano. Cik ka Rwot genere, emio rieko but jo kame li kede.

⁸ Iswilia ka Rwot opoore, kikelo yomcuny. Cik ka Rwot tie me ateni, kikelo niang.

⁹ Lworo Rwot ber; ebino meede nakanaka. Ngolo kop ka Rwot tie me ateni doko epoore.

¹⁰ Ngolo kop ka Rwot ber lo saabu; elo akadi saabu acil benyo; emit elo mokic, akadi mokic kame cwer ki apien mere.

¹¹ Bobo da gin ipwonyango epasoit nin; ango audo bero adwong pi lubo gi.

¹² Do ngai kame karuno neno abucar mere en kene? Okwe Rwot sasiro ango ki raco na kame akwia.

¹³ Gwoka ki par kame kelo ewaka; kur iwek gi kipuga. Di do likame ango ako bino bedo kede raco moro, doko ako bino bedo abongo dub moro adwong.

¹⁴ Ango akwao be iyei kop me doga kede par me cunya, Okwe Rwot, lela na kede ngalak na.