Sabuli 18 - Baibuli I Leb Kumam 2013

Wer ka Daudi me Bwono Jokwor

¹ Okwe Rwot, ango amari, in en teko na.

² Rwot en lela na, en apama atek kame gwoka, ngalak na, Rubanga na, lela na kame ango aringo gwokere bute, ebuku na, kede ngateko kame laka; en kateko na.

³ Ango alwongere but Rwot ngat kame poore apaka, di eko laka ki cing jokwor na.

⁴ Bwoi me to oudo oluka; ebuka kame neko oudo iyapi mwonya;

⁵ oudo amoko i bwoi me kabedo me jo oto; oudo ariamo kede owic me to.

⁶ I can na ako lwongere but Rwot; akok but Rubanga na pi konya. En eko winyo dwana ki tempulo mere, di koko na oko tuno i yite.

⁷ Di do piny oko yangere, eko tagere; acakini me mori da oko yangere di kitagere, pien oudo Rubanga olilo.

⁸ Yiro di oko duny ki ume, mac ager kede itonge kobokere bubu oko liel ki doge.

⁹ En eko yabo edou di eko bino piny; edou acol cucucuc oudo tie i dud tiene.

¹⁰ En eko bedo ingei Cerubim di eko por; yamo oko kute oringini kede.

¹¹ En oudo eum kede colpiny, edou apek di col kame pii opong iye oudo oluke.

¹² Akako kede itonge me mac oko wokun ki lero kame oudo tie i nyime di kiko pelao idoun acol nogo.

¹³ Rwot oko yamo ki malo bala mwoc me kot, di dwan Ngamalo Twal oko winyere.

¹⁴ En di eko gweno imalia mege eko sasaro jokwor mege; ecaro gi kede amenyumenyun me kot di eko mino gi kiringo.

¹⁵ Okwe Rwot, pii oko pokere i nam, wen pii oko neno; acakini me lobo oko dong kakaler, kakame in idorano kede gero, di ikuto wei ki umi.

¹⁶ Rwot oko cwano cinge ki malo, di eko maka; eko wota ki pii atut.

¹⁷ Bin elaka ki cing ngakwor na atek, kede kibut jo kame daga; pien gin oudo kitek, likame ango oudo atwero gi.

¹⁸ I kare kame ango oudo atie kede i peko, gin kiko sura; do Rwot oko konya.

¹⁹ En ekonya ki peko kame oudo odia; en elaka pien oudo cunye yom i koma.

²⁰ Rwot oko timo na bero di lubere kede poore na; en emia winyo pien ango ali kede raco moro.

²¹ Pien ango abedo lubo iswilia ka Rwot, doko likame ayai tenge kibut Rubanga na.

²² Pien iswilia mege dedede oudo tie i nyima, doko likame ango adagi timo gikame en oudo eciko.

²³ Ango oudo ali kede raco moro i nyime; doko oudo ango agwokere likame atimo raco moro.

²⁴ Pi mano, Rwot do otieko timo nango bero di lubere kede poore na, piento en enena ali kede raco moro i nyime.

²⁵ Rwot in igenere but jo ageni; but jo kame li kede raco moro in ili kede raco moro but gi.

²⁶ But jo kame cuny gi cil, in itimo negi bero, do but jo kame ngolo rieko, in inyuto negi rieko nin.

²⁷ In ilako jo kame mwolere, do idwoko piny jo kame tingere.

²⁸ Rwot in en kame imiango lero; Rwot, Rubanga na menyo colo kame ango atie iye.

²⁹ Pien in itie keda, ango akaruno suro ekodet me isirikalen, doko pien Rubanga na tie keda, ango akaruno somo malo kalamo apama kame kocelo kede bomba.

³⁰ Rubanga noni yongayo mere tie kakare; cikere kame Rwot mio genere; en ecal bala ebuku ne jo dedede kame ringo ot gwokere bute.

³¹ Pien ngai en kobedo Rubanga kwanyo Rwot? Doko ngai en kame cal bala lela, kwanyo Rubanga wa?

³² En Rubanga kame miango teko, doko emio yongayo kame ango alubo bedo ber.

³³ En emiango abedo dwir bala amiem, di eko mina abedo malo kakabor di likame peko moro ko tuno i koma.

³⁴ En epwonya epone me yi, tetekeny akaruno kudo tir me emal kame kotimo kede nyonyo buronsi.

³⁵ In itieko mina ebuku nin kame lako kuo na, in itieko ganga kede twer nin; kony kame in imia otieko mina abedo dano kame pire dwong.

³⁶ In imia alabo tiena lab, doko tiena likame oko cer.

³⁷ Awapo jokwor na di ako mako gi; doko likame ako dok cen tuno di oudo atieko gi.

³⁸ Ajujuto gi arereto gi piny di likame kiko karuno yai; gin kipopoto katiena.

³⁹ Pien in en kame imiango teko me yi; in imia abwono jo kame oudo osura.

⁴⁰ In imio jokwor na omuko ringo ki nyima, doko ako muducaro jo kame dingere keda.

⁴¹ Gin kiko lwongere pi mito kony, do likame tie ngatamoro kame oko konyo gi; kikok but Rwot, do en likame eko gamo koko gi.

⁴² Ango apudao gi bala apua kame yamo kuto, anyonyono gi bala cwoto me yongayo.

⁴³ In iko laka ki lok me jo; di iko keta pugo atekerin; jo kame oudo ango akwia oko doko jotic na.

⁴⁴ Cucuto di gin kiwinyo kop i koma, kiko mina wor; jokumbor obino di kiko riebere piny i nyima.

⁴⁵ Jokumbor cuny gi oko kwanyere, di kiko wokun ki kateko gi kede mielkom.

⁴⁶ Rwot kuo! Pak bed but lela na, doko tingunu malo Rubanga ngalak nango.

⁴⁷ En Rubanga kame culo kwor nango doko eketo jo itwer na.

⁴⁸ En elaka ki cing jokwor na; Rwot, ateteni in itinga malo kalamo jokwor na; in ilaka ki cing jogero.

⁴⁹ Pi manoni, Okwe Rwot, ango abino paki i diere me atekerin, abino wero wer me paki.

⁵⁰ Rubanga mio abaka mere loo kitek, en enyuto amara kalikame lokere but ngat kame en eyero, enyuto but Daudi kede ikwae mege ikar kede ikar.