Sabuli 17 - Baibuli I Leb Kumam 2013

Ilega me Dano Ali kede Raco

¹ Winy koko na Okwe Rwot, pien kop na tie me ateni; cik yiti iwiny ilega kame wok ki doga, ilega kame angalo li kiye.

² Mi lono kop na wok kibuti; wek wangi nen gikame poore.

³ Ka ingingico cunya, ka iwelao ango iwor, ka itama, likame ibino udo tim areco i kuo na; doga likame yamo kope areco,

⁴ bala kame jo apat timo; ango alubo kop kame in iyamo di likame ako yei lubo yote me jogero.

⁵ Ango abedo lubo yote nin nakanaka; tiena likame ocetar tenge.

⁶ Okwe Rubanga, ango alwongere buti pien in ibino dwoko kwac na; cik yiti di iko winyo kwac na.

⁷ Nyut amara nin kalikame lokere iepone me aura, Okwe in ngalak me jo kame ringini gwok buti ki cing jokwor gi pi twer nin.

⁸ Gwoka bala kite kame kogwoko kede tongwang; kana i tipo me bwomi,

⁹ kibut jo areco kame mito muducaro ango, jokwor na kame mito neka, jonek koluka.

¹⁰ Gin kili kede cuny me isasir; dog gi yamo kope me ewaka.

¹¹ Kiwapa kabedo dedede; nataman da kitieko luka; kiciko wang gi i koma kimito reta piny.

¹² Gin kical bala engu kame tie kiire, engu owor kame mito nyinyilo ango.

¹³ Yai, Okwe Rwot! Yi kede gi di iko bwono gi! Lak kuo na ki cing jo areco kede epima nin;

¹⁴ Okwe Rwot, laka ki cing gi kede twer nin, laka ki cing gin jo kame iner gi i kare me kuo gi tie i piny kan. Mi yi gi pong kede gikame in itieko kano pirgi; mi idwe gi ud gikame kalamo; mi gi kiwek gimoro da dong ne ikwae gi.

¹⁵ Do ango gira abino neni pien apoore; ka acei ki wang nino, tie ni keda bino yomo cunya.