Sabuli 147 - Baibuli I Leb Kumam 2013

Pako Rubanga Won Twer

¹ Pakunu Rwot! Wero were me pako Rubanga wa ber; ekelo yomcuny, doko etie gikame opoore pi mine pak.

² Rwot tie gero Yerusalem; en etie dwoko jo me Isirael kame oudo bin omako di oko tero obukui.

³ En ecango jo kame cuny gi cwer, doko etwetweo aporeso gi.

⁴ En etieko moko wel me acerin; en etieko mino gin dedede nying gi.

⁵ Rwot wa dwong, doko etie kede twon twer; niang mere tut tut kalikame wacere.

⁶ Rwot kiarao malo jo kame kodio, do ereto jodubo piny i lobo.

⁷ Werunu but Rwot di imienu pwoc; gounu wer amit ne Rubanga wa kede arigirigi.

⁸ En eumo malo kede idoun; en emio kot cwei i lobo, di eko mino lum dongo i wi imukuran.

⁹ En emio leini cam gi, ka idwe me agak da okok en emio gi cam.

¹⁰ Likame teko me asigira en kame yomo cunye, amoto dwiro me ngaringo;

¹¹ do Rwot cunye yom i kom jo kame lwore, jo kame gen gi tie i kom amara mere kalikame lokere.

¹² Pak Rwot, Okwe in Yerusalem! Pak Rubanga ni, Okwe in Sion!

¹³ Piento en kame emio irutei nin bedo tek; emio winyo but jo ni kame tie i diere ni.

¹⁴ En kame egwoko mulem i ikor ni; en epiti di iko yeng kede engano kame konungo kiber.

¹⁵ En emio cik mere i lobo, di kop mere ko tuno awakawaka.

¹⁶ En epeto akako bala yer atar me oromo; esasaro ekuna piny i lobo bala buru.

¹⁷ En elwolwomo akako piny bala kide; ngai en kame karuno kanyakino ngico mere?

¹⁸ En ewaco dwan di akako ko loi; emio yamo mere buko di pii ko mol.

¹⁹ En emio kop mere but jo mege; en emio jo me Isirael iswilia kede cik mege.

²⁰ En pwodi likame etimo kamanono but ateker moro apat; gin likame kingeo iswilia mege. Pakunu Rwot!