Sabuli 144 - Baibuli I Leb Kumam 2013

Abaka Pwoyo Rubanga pi Bwono Jokwor

¹ Pak bed but Rwot, en lela na, ngat kame pwonya yi;

² en lela na doko en apama atek kame gwoka, kateko na kede ngalak na, ebuku na, en kame ango aringo ot gwokere bute, en kame ebwono atekerin di eko keto gi i twer na.

³ Okwe Rwot, kara jo obedo nyo en kame mio in iparo pirgi, jo ajoa en kame in iparo pirgi?

⁴ Gin kical bala wei; kare me kuo gi cal bala tipo me gimoro kame tie nan do nat eli.

⁵ Okwe Rwot, yab edou di iko bino piny; mul mori tetekeny kiduny yiro.

⁶ Mi kot menyi di eko sasaro gi; gwei imalia ni di iko mino gi kiringi.

⁷ Riei cingi ki malo kuno; wota di iko laka ki twon pii; laka ki cing jokumbor,

⁸ jo kame dog gi yamo kope me angalo, doko kitingo cing gi tetu cam malo di kiko lairo i kop me abe.

⁹ Okwe Rubanga, ango abino wero ni wer anyen; abino gono ni adungu me ausin tomon.

¹⁰ In en kame imio abakai lo yi, doko in en kame ilako Daudi ngatic ni.

¹¹ Laka ki epima ager, laka ki cing jokumbor, jo kame dog gi yamo kope me angalo, doko kitingo cing gi tetu cam malo di kiko lairo i kop me abe.

¹² Mi idwe awobe wa i kare kame gin pwodi ipongai kede, kibed bala kodi apita kotieko dongo atwal, kede anyira wa da bed cal bala ipirin me esonda, kame kotongo me gero paco me abaka.

¹³ Mi dere wa pong kede kodere me epone dedede; mi romini wa nywal kimeede kidok tutumian kede tutumian.

¹⁴ Mi doke wa gari. Mi kur kotuturo apama me bomba, kur ooti itasun i piny apat, doko kur koko moro me can winyere i gudo me bomba wa.

¹⁵ Kitie kede yomcuny gin jo kame akodi winyo nono bino poto i kom gi; kitie kede yomcuny gin jo kame Rubanga obedo Rwot gi.