Sabuli 141 - Baibuli I Leb Kumam 2013

Ilega me Kwano Gwokere ki Gikarac

¹ Ango alwongi, Okwe Rwot; susunyo bino buta; cik yiti iko winyo dwana kame alwongere buti.

² Wek ilega na bed bala giawanga kame ngwe kur i nyimi, kede cinga kame atingo malo i ilega bed bala giayala me otieno.

³ Ket ngadar me doga, Okwe Rwot; gwok doga kur wac kop arac.

⁴ Kur ilok cunya i kom mito gimoro arac, pi bedo timo gikareco karacel kede jo kame timo dub; kur imia acam cam amit me ibagai gi.

⁵ Wek dano kopoore bitaro ango; Mi jo agenere riea. Kur iwek jo areco wir wia kede mo gi, pien ango alego nakanaka ilega me dagi tim gi areco.

⁶ Kame kouco jopug gi piny ki wi lela malo, jo bino ngeno be kope nango oudo tie me ateni.

⁷ Bala kidi kame dano belo di eko ngingidun, kamanono da cogere gi bino sasarun i dog kabedo me jo oto.

⁸ Do ango aloko wanga buti, Okwe Rubanga, Rwot na; ango aringini gwokere buti; kur iwek koneka.

⁹ Gwoka ki obek kame gin kitieko cika kede, kede ki owic me jo areco.

¹⁰ Mi jo areco mok i bwoi gi ken gi, di ango kena ako bwot.