Sabuli 140 - Baibuli I Leb Kumam 2013

Ilega me Kwano Gwok

¹ Laka kibut jo kame timo tim areco, Okwe Rwot, gwoka ki cing jogero,

² jo kame tam gi tie kede iik areco, doko kibedo cako yi nakanaka.

³ Gin kimio leb gi bedo bit bala me twole, doko kop kame dog gi waco cal bala kwir me emosoga.

⁴ Gwoka ki cing jo areco, Okwe Rwot; gwoka ki cing jogero, gin jo kame kitieko timo iik me reta.

⁵ Joewaka otieko cika kede obek, kiserao na bwoi, kicika kede iwicia i yongayo.

⁶ Ango awaco ne Rwot be, “In en Rubanga na; cik yiti iko winyo koko na, Okwe Rwot.”

⁷ Okwe Rwot, Rwot na, ngalak na atek, in ibedo bala ocoro atek kame gwoko wia i ceng me yi.

⁸ Kur imi jo areco gikame cuny gi mito, Okwe Rwot; kur imi iik gi areco cobere.

⁹ Kur imi jo kame oluka bwona; mi kope areco kame kiyamo i koma lokere dok ne gin.

¹⁰ Mi itonge me mac popoto i kom gi! Mi gi kipopoto i bur di likame bobo kiko twero wok.

¹¹ Kur imi ngat kame dubo nying jo bed kede yoto i lobo; mi gimoro arac ngoole wapo yor jo kame ger.

¹² Ango angeo be Rwot ngolo kop kakare ne jo kame piny oloo, engolo kop i yore me ateni ne jocan.

¹³ Ateteni jo kopoore bino pwoni, jo kame cuny gi cil bino bedo i nyimi.