Sabuli 137 - Baibuli I Leb Kumam 2013Koko me Jo me Isirael i Obukui 1 Wan bin obedo piny i nget ecilet me Babilon, di oko kok kakame oyutuno kede Sion. 2 Wan oko weko gono adungu wa oko liero gi malo i kor yen. 3 Pien jo kame oudo omako wa openyo wa were mogo; jo kame oudo tidilo wa openyo wa pi yomo cuny gi di kiwaco be, “Werunu ne wa wer acel moro me Sion!” 4 Epone mene kame wan oudo otwero wero kede wer ka Rwot i lobo me obukui? 5 Ka wia owil kedi, Okwe Yerusalem, poore bada tetu cam bed di omito! 6 Leba miero mok i dana ka ango likame ayutuno in, ka likame atamo pi Yerusalem bala gikame yomo cunya kalamo gi dedede. 7 Yutuno iko maro i wi jo me Edom, Okwe Rwot, ceng kame korereto kede Yerusalem, di gin oudo kiwaco be, “Tiatiaunu en! Tiatiaunu en! Tiatiaunu en tuno piny i acakini me apama mere!” 8 In nyar ka Babilon, in ngadudubo! Kibino bedo kede yomcuny jo kame bino culo i komi raco kame in itimo ne wa. 9 Kibino bedo kede yomcuny jo kame bino tero idwe ni di kiko nyinyito gi i lela! |
Baibuli I Leb Kumam © Bible Society of Uganda, 2013.
Bible Society of Uganda