Sabuli 136 - Baibuli I Leb Kumam 2013

Wer me Mino Pwoc

¹ Okwe miunu pwoc but Rwot, piento en eber, pien amara mere kalikame lokere bedo nakanaka.

² Okwe miunu pwoc but Rubanga ngat kame dwong kalamo rubangan dedede, pien amara mere kalikame lokere bedo nakanaka.

³ Okwe miunu pwoc but Rwot ngat kame dwong kalamo rwode dedede, pien amara mere kalikame lokere bedo nakanaka.

⁴ En kene etimo gi me isuur adongodongo, pien amara mere kalikame lokere bedo nakanaka,

⁵ en ecweo malo kede rieko mere, pien amara mere kalikame lokere bedo nakanaka,

⁶ en epeto lobo i wi pii, pien amara mere kalikame lokere bedo nakanaka.

⁷ En ecweo gi adongodongo kame rieny, pien amara mere kalikame lokere bedo nakanaka,

⁸ eketo ceng pi pugo iceng, pien amara mere kalikame lokere bedo nakanaka,

⁹ eketo duwe kede acer pi pugo iwor, pien amara mere kalikame lokere bedo nakanaka.

¹⁰ En bin eneko idwe kao i Misiri, pien amara mere kalikame lokere bedo nakanaka,

¹¹ di eko woto jo me Isirael tenge ki diere gi, pien amara mere kalikame lokere bedo nakanaka,

¹² etimo man kede cinge me teko kede bade kame erieo, pien amara mere kalikame lokere bedo nakanaka,

¹³ en eko poko Nam Akwar ki diere, pien amara mere kalikame lokere bedo nakanaka,

¹⁴ di eko mino jo me Isirael obeo ki diere mere, pien amara mere kalikame lokere bedo nakanaka,

¹⁵ do eko lwinyo Parao kede isirikalen mege i Nam Akwar, pien amara mere kalikame lokere bedo nakanaka.

¹⁶ En bin etelo jo mege ki tim, pien amara mere kalikame lokere bedo nakanaka,

¹⁷ en eko neko abakai kame tie kede twon twer, pien amara mere kalikame lokere bedo nakanaka,

¹⁸ doko da eko neko abakai kame bin singo ngere, pien amara mere kalikame lokere bedo nakanaka,

¹⁹ eneko Sikon, abaka me jo Amor, pien amara mere kalikame lokere bedo nakanaka,

²⁰ kede Og, abaka me Basan, pien amara mere kalikame lokere bedo nakanaka.

²¹ En eko mino lobo gi but jo mege, pien amara mere kalikame lokere bedo nakanaka,

²² emio but jo me Isirael pi doko mergi, pien amara mere kalikame lokere bedo nakanaka.

²³ En nono kame bin eyutuno wa i kare kame jokwor obwono wa kede, pien amara mere kalikame lokere bedo nakanaka,

²⁴ di eko lako wa kibut jokwor wa, pien amara mere kalikame lokere bedo nakanaka.

²⁵ En kame emio gi dedede akuo cam, pien amara mere kalikame lokere bedo nakanaka.

²⁶ Okwe miunu pwoc but Rubanga me malo, pien amara mere kalikame lokere bedo nakanaka.