Sabuli 135 - Baibuli I Leb Kumam 2013

Wer me Pak

¹ Pakunu Rwot! Pakunu nying Rwot; miunu pak, Okwe wun jotic ka Rwot,

² wun jo kame cungo i ot ka Rwot, jo kame cungo i diakal me ot ka Rubanga wa.

³ Pakunu Rwot, pien Rwot ber; werunu wer me pako nyinge, piento en engakisa.

⁴ Pien Rwot otieko yero ikwae ka Yakobo pi bedo mege; eyero jo me Isirael pi bedo jo mege.

⁵ Pien ango angeo be Rwot dwong; Rwot wa dwong kalamo rubangan dedede.

⁶ Rwot timo gimoro kenekene kame yomo cunye, i malo kede i lobo, i name kede i pie atut.

⁷ En kame emio idoun tingere i ajikini me lobo; en kame emio meny me kot timere di kot ko cwei, di eko woto yamo abuko ki ude mege me kano jame.

⁸ En nono kame bin eneko idwe kao i Misiri, idwe kao me jo karacel kede me leini.

⁹ En etimo gianena kede gi me isuur i diere ni, Okwe Misiri, etimo gi pi keto can i kom Parao kede jo mege.

¹⁰ En eneko jo me atekerin atot, di eko neko abakai atek:

¹¹ Sikon, abaka me jo Amor, kede Og, abaka me Basan, kede ajakanuto dedede me Kanan.

¹² En eko mino lobo gi but jo mege, emie but jo me Isirael pi doko mergi.

¹³ Nyingin bedo nakanaka, Okwe Rwot, in ingere i kare dedede, Okwe Rwot.

¹⁴ Pien Rwot bino ngolo kop kame gonyo jo mege kiko bedo abongo raco; kisa bino make i kom jotic mege.

¹⁵ Caljwogi me atekerin apat obedo siliba kede saabu, gin kibedo tic me cing dano.

¹⁶ Gin kitie kede dog gi do likame kitwero yamo, kitie kede wang gi do likame kineno piny;

¹⁷ kitie kede yit gi do likame kiwinyo kop, doko da wei likame tie i dog gi.

¹⁸ Jo kame timo gi, kede jo kame keto gen gi i kom gi, jo nogo dedede bino doko cal bala gin.

¹⁹ Okwe wun jo me Isirael, pakunu Rwot! Okwe wun josaseredoti, pakunu Rwot!

²⁰ Okwe wun Jolebi, pakunu Rwot! Wun jo kame ilworunu Rwot, pakunu Rwot.

²¹ Pakunu Rwot i Sion, en ngat kame ebedo Yerusalem. Pakunu Rwot.