Sabuli 12 - Baibuli I Leb Kumam 2013

Ilega me Kwano Kony

¹ Kony wa Okwe Rwot, pien likame do tie ngatamoro kame woro Rubanga; jo kame geni otieko doko li i diere me jo.

² Gin dedede kingalere ken gi ken gi; kingalere kede kope amit me dog gi do di kope me cuny gi pat.

³ Rwot, mi jo kame yamo kope me angalo lingi, jo kame wakere twatwal be,

⁴ “Kope kame wan oyamo bino mino wa oudo gikame omito. Kope wan en megwa, ngai bo kame pugo wa?”

⁵ Rwot waco be, “Pien kotero jocan kirac, doko jo kame koridakino tie dinyo, ango nataman ayaro bino mino gi gwok kame cuny gi mito.”

⁶ Cikere kame Rwot mio genere; kitie me ateteni bala nyonyo siliba kame kojililo tien kanyaare.

⁷ Okwe Rwot, in ibino gwoko wan; ibino gwoko wa nakanaka ki cing lwak me i kare noni.

⁸ Jo areco tie ceede kabedo dedede, bala kame jo pwoyo kede tim areco i diere me jo.