Sabuli 118 - Baibuli I Leb Kumam 2013

Ilega me Pwoc pi Bwono Jokwor

¹ Okwe, miunu pwoc but Rwot, piento en eber; amara mere kalikame lokere bedo nakanaka!

² Poore jo me Isirael wac be, “Amara mere kalikame lokere bedo nakanaka.”

³ Poore jo me ot ka Aaron wac be, “Amara mere kalikame lokere bedo nakanaka.”

⁴ Poore jo kame lworo Rwot wac be, “Amara mere kalikame lokere bedo nakanaka.”

⁵ Can kame oudo atie iye oko mina alwongere but Rwot; Rwot oko winyo kwac na di eko mina alakanar.

⁶ Rwot tie keda, omio ango likame abino bedo lwor; nyo kame dano adana karuno timo na?

⁷ Rwot tie keda pi konya; ango abino neno di ebwono jo kame daga.

⁸ Ringo ot gwokere but Rwot ber, elo keto gen i kom dano adana.

⁹ Ringo ot gwokere but Rwot ber, elo keto gen i kom jotel me jo.

¹⁰ Atekerin dedede oudo olukaro ango; do pi twer ka Rwot ango ako muducaro gi!

¹¹ Gin kilukaro ango ki bad dedede; do pi twer ka Rwot ango ako muducaro gi!

¹² Gin kibwangun i koma lukaro ango bala kic; oko bunyo jiko gero gi bala mac aliel raurau me okuto; ango ako muducaro gi pi twer ka Rwot!

¹³ Oudo kosura kitek, omio oudo kotie bwona, do Rwot oko konya.

¹⁴ Rwot en kame miango teko kede twer; en etieko doko ngalak na.

¹⁵ Were me kilel me bwono jokwor tie i kimere me jo kopoore: “Twer ka Rwot otieko bwono yi;

¹⁶ komio twer ka Rwot dwongo; twer ka Rwot timo gi me aura.”

¹⁷ Ango likame abino to, do abino bedo kuo, di ako tatamo gikame Rwot otimo.

¹⁸ Rwot otieko mina alola atek, do likame eko jala ne to.

¹⁹ Yab na irutei me jo kopoore, me wek adony di ako mino pwoc but Rwot.

²⁰ Man en erute kame donyo but Rwot, jo kopoore bino donyo di kibeo kiye.

²¹ Ango apwoi pien in igamo kwac na di iko doko ngat kame laka.

²² Kidi kame jogedo odagi olokere odoko kidi kame pire tek me esonda.

²³ Man Rwot en kotimo; i wang wa en etie gi me aura.

²⁴ Manoni en ceng kame Rwot otieko iiko; mito olelunu di okounu bedo kede yomcuny iye.

²⁵ Okwe Rwot, wan ongangao in, lak wa! Mi gikame otimo cobere, Okwe Rwot!

²⁶ Etie kede winyo ngat kame bino i nying Rwot. Wan olamo ni winyo ki ot ka Rwot.

²⁷ Rwot en Rubanga; en etieko timo ne wa bero. Makunu jange me yen i cingu ikounu cako ebaga, di ikounu ot i esirit rimaro alutari.

²⁸ In en Rubanga nango, ango abino mini pwoc; in en Rubanga nango, ango abino paki.

²⁹ Okwe miunu pwoc but Rwot, piento en eber, pien amara mere kalikame lokere bedo nakanaka.