Sabuli 116 - Baibuli I Leb Kumam 2013

Mino Pwoc pi Alako ki To

¹ Ango amaro Rwot piento en ewinyo dwana; en ewinyo kwac na.

² Pien eciko yite winyo kwac na, pi mano ango abino lwongere bute tek di pwodi ango akuo.

³ To oudo ociko owic mere oluka; lito me kabedo me jo oto oudo otuno na; oudo aneno can di atie kede par atek.

⁴ Di do ango ako lwongere but Rwot be, “Okwe Rwot, ango akwai ilak kuo na!”

⁵ Rwot ngakisa doko epoore; Rubanga wa timo jo kisa.

⁶ Rwot gwoko jo kalikame karuno gwokere ken gi; kakame oudo adoko do kede goro, en eko laka.

⁷ Okwe kuo na do bino bedo mot, pien Rwot otieko timo na bero adwong.

⁸ Rwot otieko lako kuo na ki to, doko elaka ki koko, kede egwoko tiena likame ogete.

⁹ Pi mano, ango abedo i nyim Rwot i lobo me jo akuo.

¹⁰ Ango ako meede kede yei na kamanono, akadi kakame awaco kede be, “Atie neno can twatwal,”

¹¹ akadi kakame lworo omaka kede di ako waco be, “Jo dedede likame genere.”

¹² Nyo kame ango abino mino but Rwot pi bero dedede kame en etimo na?

¹³ Ango abino mino Rwot giamia me bwini pi pwone, di apako nyinge.

¹⁴ Ango abino cobo timo gikame akwongere iye but Rwot, i nyim jo mege dedede.

¹⁵ To me jo kame geno Rwot tie gikame lit kibute.

¹⁶ Okwe Rwot, ango abedo ngatic nin; ango abedo epasoit nin, atin ka nyako kame timo nin tic. In itieko laka ki to.

¹⁷ Abino mini giayala pi pwoni di alwongo nyingi.

¹⁸ Ango abino cobo gikame akwongere iye but Rwot, i nyim jo mege dedede,

¹⁹ i diakal me ot ka Rwot, i diere nin, Okwe Yerusalem. Pakunu Rwot!