Sabuli 114 - Baibuli I Leb Kumam 2013

Wer me Yutuno Ebaga me Kalamo

¹ I kare kame jo me Isirael oyai kede ki Misiri, yai me jo me ot ka Yakobo kibut jo kame yamo leb apat,

² Yuda oko doko kabedo kacil ka Rubanga, Isirael oko doko kakame en epugo.

³ Nam bin oneno gi di eko ringo; ecilet me Yorodan da oko lokere mol dok cen.

⁴ Mori oko takaro bala romini, kede imukuran da bala idwe me romini.

⁵ Pinyo bo, Okwe nam, komio in iko ringo? Okwe Yorodan, pinyo komio in iko lokere mol dok cen?

⁶ Okwe wun mori, pinyo komio wun ikounu takaro bala romini? Okwe wuda imukuran, pinyo komio wuda ikounu takaro bala idwe me romini?

⁷ Bed kede mielkom, Okwe in lobo, pi bino me Rwot, pi bino ka Rubanga ka Yakobo,

⁸ ngat kame loko lela doko atapar me pii, eloko engaro da doko atan me pii amol.