Sabuli 112 - Baibuli I Leb Kumam 2013

Yomcuny me Dano Aber

¹ Pakunu Rwot! Etie kede winyo dano kame lworo Rwot, ngat kame cunye yom twatwal pi lubo cik mege.

² Ikwae mege bino bedo jo atek i lobo kame kitie iye; jo me ekeko me dano kopoore nono bino bedo kede winyo.

³ Lonyo kede abar tie i ode; doko poore mere bedo nakanaka.

⁴ En ecal bala lero kame wok di eko rieny i colo ne jo kopoore; en emwol, engakisa doko epoore.

⁵ Gi dedede tie kiber ne ngat kame kopao jo jame kede cunye dedede, ngat kame timo tice mege kede ateni.

⁶ Pien likame tie gikame bino bwono ngat kopoore; kobino yutuno en nakanaka.

⁷ Rwonge arac likame kelo ne lworo; cunye tek, en egeno Rwot.

⁸ En cunye tek, likame ebino bedo lwor; i ajikini en ebino neno di kobwono jokwor mege.

⁹ En emio but jocan kede cunye dedede; bero mere bedo nakanaka; en ebino bedo dano atek kame koworo.

¹⁰ Jo areco neno di cuny gi ko wang; gin kikakao lak gi pi gero di kiko rwenyo; mit me jo areco kei.