Sabuli 111 - Baibuli I Leb Kumam 2013

Wer me Pako Rwot

¹ Pakunu Rwot! Abino mino Rubanga pwoc kede cunya lung, abino pwone i ekodet me jo kame cuny gi ber, i kacokere me jo mege.

² Tice kame Rwot timo dongodongo, jo dedede kame cuny gi yom i kom tice nogo tie kede mit me udo niang i kom gi.

³ Tice kame en etimo kelo wor bute kede dwongo, doko poore mere bedo nakanaka.

⁴ En emio wan yutuno tice mege me aura; Rwot mwol doko engakisa.

⁵ En emio cam but jo kame lwore; nakanaka en eparo pi isikan mere.

⁶ En etieko nyuto ne jo mege twer me tice mege, di emio lobo me atekerin apat doko mergi.

⁷ Tice me cinge genere doko kitie me ateni; cik mege dedede genere,

⁸ kotieko keto gi pi ikar kede ikar, pi jo lubo gi di kigenere kede di kipoore.

⁹ En emio jo mege alako; en etieko timo kede gi isikan kame bedo nakanaka. Nyinge cil doko epoore me alwora.

¹⁰ Lworo Rwot en acakini me rieko; jo kame timo kamanono tie kede niang aber. Poore pake nakanaka!