Sabuli 106 - Baibuli I Leb Kumam 2013

Bero ka Rwot but Jo mege

¹ Pakunu Rwot! Okwe miunu Rwot pwoc piento en eber; pien amara mere kalikame lokere bedo nakanaka.

² Ngai kame twero tatamo jamini adongodongo kame Rwot otimo, amoto kame twero pake iepone kame miero pake kede?

³ Kitie kede yomcuny jo kame tio i yore me ateni, jo kame timo gikame opoore i kare dedede.

⁴ Yutuno ango, Okwe Rwot, kame inyuto amara ni but jo ni; konya kame itie lako gi;

⁵ tetekeny ako bino neno bero kame jo ni kame in iyero bino udo, me wek ada ako bino lelo kede ateker ni pi yomcuny gi, kede ako nywako ewaka kame jo nin tie kede.

⁶ Wan karacel kede joakwari wa odubo; wan otimo dub, otimo raco.

⁷ Bin di joakwari wa oudo tie Misiri, gin likame kiko paro pi tice nin me aura; gin likame kiko yutuno amara nin adwong kalikame lokere, do gin kiko lunyo jemo ne Ngamalo Twal i Nam Akwar.

⁸ Do en eko lako gi pi bero me nyinge, tetekeny emi twer mere adwong ngere.

⁹ En ecokere di Nam Akwar oko tuo; en eko telo gi ngolo pii atut ineno bala kitie beo ki wi tim.

¹⁰ Aso en eko lako gi ki cing jokwor gi; emio gi kibwot kibut jo kame oudo dagi gi.

¹¹ Pii oko mwonyo jokwor gi; likame akadi acel kikom gi oko bwot.

¹² Di do gin kiko yei kop mere; kiko wero wer me pake.

¹³ Do oyotoyot wi gi oko wil kede tice mege, likame gin kiko daro pi winyo tam kame Rubanga mio gi.

¹⁴ Do kiko pong kede mit i cuny gi i wi tim, di kiko tamo Rubanga ki kuno.

¹⁵ En eko mino gi gikame kipenyo, do eko cwano negi tuwo ajonyo gi.

¹⁶ Nyeko oudo omako gi i wi tim i kom Musa, kede Aaron da, dano kacil ka Rwot.

¹⁷ Lobo oko ngamere eko mwonyo Datan, eko pukakino jo ka Abiram.

¹⁸ Mac da oko amotun i kom gi, di eko wango jo areco.

¹⁹ Gin kitimo cal me roya i moru me Sinai di kiko donyo woro cal kame kocweo acwea.

²⁰ Gin kiseso deyo ka Rubanga, kiko lokere mine but cal me twon kame camo lum.

²¹ Wi gi owil kede Rubanga, Ngalak gi, ngat kame oudo otimo gikame dongodongo i Misiri;

²² en etimo tice me aura i lobo ka Kam, kede tice kame kelo lworo i Nam Akwar.

²³ Omio en eko waco be koto emuducaro gi, do Musa ngat kame oudo obedo dano kame en eyero oko galao en, di eko gengo gero ka Rubanga tetekeny kur emuducaro gi.

²⁴ Di do gin kiko dagi donyo i lobo aber, pien likame kiyei cikere ka Rubanga.

²⁵ Gin kibedo kede ingungur i iemai gi, di likame kiko lubo gikame Rwot owaco.

²⁶ Omio Rwot oko tingo cinge malo eko kwongere negi, be oudo eyaro mino gi kito i tim,

²⁷ di eko bino sarakino ikwae gi i diere me atekerin apat, eko mino gi kito i lobere ace apat.

²⁸ Gin riki kiko donyo woro rubanga kame nyinge Baal i Peor, di kiko camo giayala kame komio but rubanga kame rom aroma kede gi oto.

²⁹ Gin kiwango cuny Rubanga kede tice gi di en eko doko ger, omio aumpuli oko poto i diere gi.

³⁰ Pinekasi oko yai eko kwano Rubanga pirgi, di aumpuli oko doko li.

³¹ Manono oko mino kobedo tere be ngat kopoore i lwak acelacel me kare dedede.

³² Gin kimio Rwot odoko ger i dog pii me Meriba, manono oko mino kotero iye Musa kirac pirgi;

³³ pien gin kimio Musa wangcuny, di eko waco kope kame oudo likame epoore pi yamo.

³⁴ Bin gin likame kineko jo me atekerin apat, bala kame oudo Rwot ociko negi.

³⁵ Do gin kiko lunyo nyalere kede jo me atekerin apat, kiko pwonyere timo gikame jo nogo oudo timo.

³⁶ Gin kilokere kidonyo woro caljwogi ka jo nogo, manoni oko doko negi bala owic.

³⁷ Gin kiyalo awobe gi kede anyira gi ne jwogi nono;

³⁸ kionyo remo me jo kame li kede raco moro, remo me awobe kede anyira gi, jo kame bin gin kiyalo ne caljwogi me Kanan; pi manono, lobo gi nono oko munaun kede remo.

³⁹ Manoni oko mino gi kidoko jo komunaun pi tice gi, doko kiko doko bala imalayan pi gikame kitimo.

⁴⁰ Gi noni oko twaruno gero ka Rwot i kom jo mege, di eko cako neno jo mege bala jo areco i wange.

⁴¹ En eko jalo gi i cing jo me atekerin apat, tetekeny jo kame oudo dagi gi dony pugo gi.

⁴² Jokwor gi oko donyo tero gi kirac, di kiko mino gi kidoko jo kame lubo kop me apugan gi atwal atwala.

⁴³ Tien atot Rwot olako gi, do gin kiko bedo jemo ne me akaa, manoni oko mino gi kidok piny apinya pi dub gi.

⁴⁴ Akadi kamanono da, en eko winyo koko gi di eko paro pi can gi.

⁴⁵ En eyutuno isikan mere pirgi, di eko nyuto cuny me kisa di lubere kede twon amara mere kalikame lokere.

⁴⁶ En emio jo dedede kame oudo omako gi bala mabus obedo kede kisa i kom gi.

⁴⁷ Lak wa, Okwe Rwot Rubanga wa, di iko coko wa ki diere me atekerin apat, me wek opwoi nyingi kacil di oko bedo kede deyo pi paki.

⁴⁸ Pak bed but Rwot Rubanga me Isirael, ikar kede ikar. Poore jo dedede wac be, “Amen.” Pakunu Rwot!