Sabuli 105 - Baibuli I Leb Kumam 2013

Rubanga kede Jo mege

¹ Okwe, miunu pwoc but Rwot, lwongunu nyinge, miunu tice mege ngere but jo apat.

² Werenu were, werenu were me pak; tatamunu tice mege me aura.

³ Lelunu pi nyinge kacil; jo kame mo Rwot poore kileli.

⁴ Mounu Rwot karacel kede teko mere; mounu wange nakanaka.

⁵ Yutununu gi me isuur kame en etieko timo, gi me isuur mege, kede kop kame etieko ngolo,

⁶ Okwe wun ikwae ka Aburaam ngatic mere, idwe ka Yakobo, jo kame en eyero.

⁷ En Rwot Rubanga wa; en engolo kop i wi lobo lung.

⁸ En egwoko isikan mere nakanaka, ecobo cikere mere but lwak me kare lung,

⁹ en isikan kame bin en etimo kede Aburaam, kede cikere mere kame ekwongere kede but Isaka.

¹⁰ En bin emoko isikan noni but Yakobo bala cik, kede but jo me Isirael bala isikan kame bedo nakanaka.

¹¹ En ewaco be, “Ango abino mini lobo me Kanan pi bedo iner kame mako wu.”

¹² Kakame gin oudo kinonok kede, gin jo anok anoka kame tie bala jokumbor i lobo nono,

¹³ jo kame oudo obedo rimo piny arima yai ki piny acel tuno i piny ace, yai ki ajakanut acel tuno but jo apat,

¹⁴ Rubanga likame oko yei ne ngatamoro timo negi adiadia; en eronkino abakai pirgi.

¹⁵ Ewaco be, “Kur imulunu jo na kame ayero, kur itimunu gimoro arac ne inabin na.”

¹⁶ Kakame emio kec opoto kede i lobo nono, eko mino mugati odoko li negi,

¹⁷ en kong oudo egeo cwano icuo moro telo negi anyim, en Yosepu, ngat kame oudo kocato bala epasoit.

¹⁸ Bin kotweo tiene kede irikoi, korwako lilim da i ngute;

¹⁹ tuno kede kakame gikame oudo en ewaco ocobere kede. Kop ka Rwot oko bedo nyute be en dano me ateni.

²⁰ Abaka oko cwano kop emio kogonye; ngapug me atekerin omio koweke.

²¹ En eko mine ebedo ngaloc me ode, kede ngat kame pugo jame mege dedede;

²² komie twer me pwonyo bala kame cunye mito jotic adongo me ka abaka, kede me pwonyo joadongo mege pi mino gi udo rieko.

²³ Di do jo me Isirael oko bino Misiri; jo me Isirael oko bedo i lobo ka Kam bala jokumbor.

²⁴ Di Rwot oko mino jo mege onywal twatwal, eko mino gi kidoko tek kalamo jokwor gi,

²⁵ gin jo kame eloko cuny gi kiko dagi jo mege, di kiko donyo ngolo negi rieko.

²⁶ En eko cwano Musa ngatic mere, kede Aaron, jo kame en eyero.

²⁷ Gin kiko timo gianena mege i diere gi; kitimo gi me isuur i lobo ka Kam.

²⁸ En ecwao colpiny eko mino lobo nono odoko col, do gin kiko dagi winyo kop mere.

²⁹ En eloko pie gi odoko remo, eko mino deknam dedede oto.

³⁰ Igwalogwalon oko bwote i lobo gi, akadi paka i ude me abaka gi da.

³¹ En eko yamo, di ekodet me lwangini ager oko bwote i lobo gi dedede, karacel kede onyogo.

³² En eko mino akako ocwei negi akaka kot, kede meny me kot kame caro piny gi dedede oko bedo tie.

³³ En eko dudubo yen olok kede epigi gi, eko tuturo yen me piny gi.

³⁴ En eko yamo, di obonyo oko bino, idwe me obonyo kalikame wel gi marere,

³⁵ gin kiko camaro lum kede boke dedede kame tie i lobo gi, di kiko camaro cam dedede kame kopito.

³⁶ Di eko neko idwe kao dedede i lobo nono, kame obedo adwogini me agege me teko gi.

³⁷ Di do eko woto jo me Isirael di kimako siliba kede saabu, doko da likame tie ngatamoro i diere gi kame kome oko udo peko moro.

³⁸ Jo me Misiri oko bedo kede yomcuny kakame kiyai kede, pien oudo kitie kede lworo i kom gi.

³⁹ En eko yaro edou pi umo gi, kede eko mino gi mac iwor pi mino gi lero.

⁴⁰ Kakame kikwae kede, en eko cwano negi aluru, eko mino gi cam atot kame owok ki malo.

⁴¹ Etuco lela di pii oko lelepa, di eko mol i wi tim bala ecilet.

⁴² Piento en oudo eyutuno cikere mere kacil but Aburaam ngatic mere.

⁴³ Aso en eko woto jo mege di kitie kede kilel, ewoto jo mege kame eyero di kiwero.

⁴⁴ En eko mino gi lobo me atekerin apat, kiko lunyo abar me jo apat oko doko mergi,

⁴⁵ me wek kigwok cik mege, di kiko lubo iswilia mege. Pakunu Rwot!