Sabuli 104 - Baibuli I Leb Kumam 2013

Wer me Pako Ngacwec

¹ Ango abino pako Rwot, Okwe Rwot Rubanga na, in idwong twatwal. In ingapere kede wor kede dwongo,

² in iboore kede lero bala egoe. In iyararo malo bala eema,

³ in igero kabedo nin i pii kame tie i malo. In imio idoun odoko bala cabala nin, di iko ringo kede ki wi yamo.

⁴ In imio yamo bedo ngaor nin, imio mac kede leb mac bedo jotic nin.

⁵ In isipo lobo di etek i wi acakini mere tetekeny kur etwer yangere.

⁶ In iume kede pii atut bala egoe, pii oko cungo ikumemei kalamo wi mori.

⁷ Kakame in icokere kede, pii oko ringo, gin kidipo ringo kakame in icokere kede bala mwoc me kot.

⁸ Gin kimol malo i wi mori, kiko mol piny i aditoto, kabedo kame in iiko negi.

⁹ In iko keto ikor kalikame gin kitwero ngolo, tetekeny kur doko kitwer umo wi lobo.

¹⁰ In imio ataneko olelepo pii ki aditoto; kimol ki dierediere me imukuran,

¹¹ di kiko mino pii me amata but leini me obar dedede; punda me obar neko orio gi ki kanono.

¹² Winy me wi yamo gero ude gi i isamai nogo; gin kiwoo kede koko i ajange me yen.

¹³ In icwao kot ki malo oko cwei i wi mori, di lobo oko pong kede bero kame in imio.

¹⁴ In imio lum libano ne doke, kede giapita dongo pi dano tic kede gi, tetekeny ekaruno puro lobo di eko udo cam,

¹⁵ di eko timo bwini kame yomo cunye, kede mo kame esuto i wange ko meny, kede mugati kame mie teko.

¹⁶ Yen ka Rwot udo pii atot, gin en seda me Lebanon kame en epito.

¹⁷ Winy gero ude gi i wi yen nogo, etolut gero ode i wi yen kame kolwongo be pain.

¹⁸ Amorio bedo i wi mori aboco; lela obedo kakame eles ringo ot gwokere iye.

¹⁹ In icweo duwe pi poko kare; ceng ngeo esawa mere me donyo.

²⁰ In icweo colpiny, manono obedo iwor, en esawa kame leini dedede me abum wok kede ooko.

²¹ Idwe me inguon dwaro leini me acama di kidorano, di kimoo cam gi kibut Rubanga.

²² Kame ceng owok, gin kidok cen di kiko buto i kapwono gi.

²³ Jo yai kioto i tice gi di kiko tic paka piny yuto.

²⁴ Okwe Rwot, cwec nin tin tot benyo! In itieko cweno gin dedede kede rieko; lobo opong kede jamini kame in icweo.

²⁵ Tie twon nam adwong di elac, jamini akuo kalikame marere tie iye, jamini akuo atino kede adongo karacel.

²⁶ Imerin beo kiye, doko da Lebiatan tuko kiye.

²⁷ Magi dedede ngio wangin, pi mino gi cam i kare kopoore.

²⁸ Kame in iko mino gi, gin kicamo; kame in iyaro cingi mino gi cam, gin kiyeng kede jamini abeco.

²⁹ Kame in ikano negi wangi, manono onyo koyo i kom gi; kame in ikwanyo wei gi, gin kito di kiko dok i apua.

³⁰ Kame in ikuto wei ni i yi gi, gin kicwere; di in iko mino kuo anyen i wi lobo.

³¹ Akwao be deyo ka Rwot bed nakanaka; poore Rwot bed kede yomcuny i kom gikame etimo.

³² Ka en engoloro lobo, lobo yangere; ka en emulo moru, yiro duny kiye.

³³ Ango abino wero ne Rwot wer i kare lung me kuo na; abino wero wer me pako Rubanga di pwodi akuo.

³⁴ Akwao be miero kop kame cunya paro yom cunye, pien ango alelo pi Rwot.

³⁵ Poore muducaro jodubo ki wi lobo, doko miero jo areco bed li atwal. Okwe, ango abino pako Rubanga. Pak bed but Rwot.