Sabuli 103 - Baibuli I Leb Kumam 2013

Amara ka Rubanga

¹ Abino pako Rwot, adulion dedede kame tie i koma miero pak nyinge kacil.

² Abino pako Rwot, doko likame wia bino wil i kom bero kame en etimo na.

³ Piento en esasiro dub na dedede, ecango tuwo na dedede.

⁴ En elako kuo na ki ates, enyuto na amara kalikame lokere kede cuny me kisa.

⁵ En emia jamini abeco i kare me kuo na lung, tetekeny abed dano kodoko nyen kede kame tek bala ekokom.

⁶ Rwot ngolo kop kakare, engolo kop kame gonyo jo dedede kame kotie tero kirac.

⁷ En bin emio Musa ongeo iik mege, doko da bin emio jo me Isirael ongeo tice mege.

⁸ Rwot mwol doko engakisa, en likame esunyo doko ger, doko epong kede amara kalikame lokere.

⁹ En likame ebunano jo nakanaka, doko da en likame edong di eger nakanaka.

¹⁰ En likame emio wa alola pi dub wa bala kame oudo mitere, doko da en likame eculo raco i kom wa pi dub wa.

¹¹ Pien bala kame malo tie kede kakabor yai ki wi lobo, amara mere kalikame lokere but jo kame lwore da rom kamanono.

¹² Bala kame tetu kide bor kede yai ki tetu tim, iepone nono da en ekwanyo dub wa eko jwango gi kakabor kamanono.

¹³ Bala kame papa me idwe bedo kede kisa i kom gi, kamanono da kisa mako Rwot i kom jo kame lwore.

¹⁴ Piento en engeo epone kame kocweo wa kede, en engeo kiber be wan obedo apua.

¹⁵ Kuo me jo kare mere rom aroma bala me lum, kare me kuo gi rom aroma bala me ature me obar.

¹⁶ Pien yamo buko i kome di eko rwenyo wir, en erwenyo atwal atwala ki kakame oudo etie cungo iye.

¹⁷ Do amara kalikame lokere ka Rwot tie pi kare dedede but jo kame lwore, doko poore mere kelo alako but ikwae kede ikwae

¹⁸ me jo kame gwoko isikan mere, di kiyutuno timo gikame en eciko negi.

¹⁹ Rwot otieko cibo kom mere me ajakanut i malo, doko en epugo jo dedede.

²⁰ Pakunu Rwot, Okwe wun imalaikan mege, wun wegi twer kame timo gikame en eciko, kede kame lubo kop kame en ewaco.

²¹ Wun jo yi ka Rwot, pakenu, wun jotic mege kame timo gikame en emito.

²² Wun gi dedede kame Rwot ocweo, pakenu, i kabedo dedede kame en epugo. Okwe, ango abino pako Rwot!