Sabuli 102 - Baibuli I Leb Kumam 2013

Ilega me Dano atie i Peko

¹ Winy ilega na, Okwe Rwot, wek koko na tun buti.

² Kur ilok wangi tenge kibuta, i ceng kame atie kede i peko. Cik yiti buta; susunyo gamo doga i ceng kame alwongi kede.

³ Pien ceng me kuo nango bino rwenyo wir bala yiro, doko cogere na mwoda di kiliel aliela bala mac me keno.

⁴ Cunya oner bala lum kame kodao piny; anuore omio likame atwero camo cam na.

⁵ Acur twatwal, omio ringo koma otuo omakakin i cogere na.

⁶ Ango acal do bala etukiri me wi tim, acal do bala atin etukiri kame bedo i ameje.

⁷ Abuto abongo nino; acal bala winyo kame tie kene i wi ot.

⁸ Jokwor na bedo yeyeto ango ceng dedede; jo kame nyera tio kede nyinga me lamo jo apat.

⁹ Ango acamo buru akaka kwon, doko pigewanga mol eko nyale kede giamata na,

¹⁰ etie kamanoni pi wangcuny kede pi gero nin; pien in itinga malo iko giri uca tenge.

¹¹ Ceng me kuo nango cal bala tipo me yat timo otieno; acal bala lum oner.

¹² Do in, Okwe Rwot, ibedo i kom ni me pug nakanaka, lwak me kare dedede yutuno nyingin.

¹³ In iyaro yai di kisa ko maki i kom Sion, pien kare inononi me in timo ne bero; kare kame oudo kociko otieko tuno.

¹⁴ Pien jotic nin mare, doko kisa mako gi i kome akadi di kotieko tiatiao gedo mege odoko apua.

¹⁵ Atekerin dedede bino lworo nying Rwot, doko abakai dedede me wi lobo bino lworo dwongo nin.

¹⁶ Pien Rwot bino bobo medo gero Sion; kobino nene di etie i deyo mere.

¹⁷ En ebino winyo ilega me jo kame piny oloo; en likame ebino bedo kede acae i kom ilega gi.

¹⁸ Miero wandiko kop noni pi lwak me kare me anyim, tetekeny jo kalikame pwodi konywalo da bin pak Rwot,

¹⁹ di kiwaco be, Rwot oneno piny ki kabedo mere kacil kame bor malo, Rwot oneno piny ki malo.

²⁰ Etimo kaman tetekeny ewiny cur me jo kame kotweo i otkol, pi gonyo jo kame oudo kongolo negi kop me to;

²¹ tetekeny kotatamo nying Rwot i Sion, di oko pake i Yerusalem,

²² kame jo me atekerin kede ajakanuto apapat ocokere karacel pi woro Rubanga.

²³ En ekwanyo teko na di pwodi kuo na lac; emio ceng me kuo na odoko nonok.

²⁴ Okwe Rubanga na, kur ikwanya itera tenge di pwodi kare me kuo na lac, in ngat kame ikuo nakanaka.

²⁵ Riki sek in icibo acakini me lobo, doko gikame tie i malo obedo tic me cingi.

²⁶ Gin kibino rwenyo wir, do in ibino dong di itie nakanaka; gin dedede kibino ti bala egoe. In ilokoloko gi bala igoen, di gin kiko rwenyo wir;

²⁷ do in idong di ical acala, doko mwakini me kuo nin likame jik.

²⁸ In ibino gwoko idwe me jotic nin; ikwae gi da bino kuo i nyimin.