Sabuli 10 - Baibuli I Leb Kumam 2013

Ilega me Kwano Ngolo Kop i Ateni

¹ Okwe Rwot, pinyo komio icungo kakabor abora? Pinyo komio ipwono apwona i kare me peko?

² Jo areco tie tidilo jocan kede twon ewaka, mi gi kimoki i owic kame gin kitieko ciko.

³ Pien jo areco wakere pi mit gi me cuny gi, jo kame tie kede keu me ud i yore arac dagi Rubanga di kicae.

⁴ Jo areco likame paro pi mono Rubanga, gin kiwakere di kitie kede tam kame waco be, “Rubanga gire li.”

⁵ Gikame gin kitimo cobere kiber. Likame gin kiniang epone nin me ngolo kop, kom eli alia i tam gi; gin kisuk i nyim jokwor gi.

⁶ Gin kitamo i cuny gi be, “Likame tie gikame bino yango wa; i kare lung likame wan obino riamo kede peko moro.”

⁷ Dog gi opong kede ilam, angalo, kede kope me adiadia, leb gi woto kope kame kelo peko kede me dub.

⁸ Gin nakanaka kipwono kino jo i calere; kineko jo kame li kede kop moro i kapwono gi. Kingibuco wang gi neno jo kame piny oloo,

⁹ gin kipwono i mung pi kino jo bala engu, gin kipwono me wek kimak jocan, kimako jocan kiko ware kede gi i bwoi gi.

¹⁰ Gin kigungo, kigugumo, teko gi ko bwono jo kame piny oloo.

¹¹ Gin kitamo i cuny gi be, “Wi Rubanga owil, eumo wange likame ebino neno tim wa.”

¹² Yai, Okwe Rwot; Okwe Rubanga, kiarao badi; kur wi wil kede jo kame kodio.

¹³ Pinyo mio jo areco dagi Rubanga, di kiwaco i cuny gi be, “Likame ebino mino wa alola”?

¹⁴ Do ida itie neno! In ingico peko kede cwercuny kame jo tie kede, tetekeny isobolo mino kony. Jo kame kabeo olo jalo kuo gi i cingi; in ibedo ngakony me idwe kic.

¹⁵ Tuturo cing jo areco kede jo kame timo tim areco; moi raco gi paka udo gin dedede abongo acel moro dong.

¹⁶ Rwot obedo abaka me ikar kede ikar. Atekerin kame dage bino to ki lobo mere.

¹⁷ Okwe Rwot, in ibino winyo kwac me jo amwol; ibino mino gi tekcuny.

¹⁸ In ibino ciko yiti winyo koko me idwe kic kede me jo kame kotero kirac; ibino ngolo negi kop aber, tetekeny jo me lobo kan kur doko kel lworo.