Obadia 1 - Baibuli I Leb Kumam 2013

¹ Manoni en kop amako Edom, kame Rwot Rubanga bin omio Obadia. Rwot otieko cwano ngaor mere but atekerin, kop mere kame wan owinyo ine be, “Iikerenu! Mito iotunu yi kede Edom!”

Rwot bino mino Jo Edom Alola

² Rwot waco ne jo Edom be, “Ango ateteni abino mino idokunu jo agoro twatwal i diere me atekerin; jo dedede bino bedo kede acae but wu adikinicel.

³ Ewaka me cunyu ongalo wu. Bomba wu adwong tie kakobabarun me mori; paco wu tie malo i wi moru, manono en komio wun iwacunu i cunyu be, ‘Likame tie dano moro akadi acel kame twero wano wan piny.’

⁴ Do akadi iporunu i malo bala ekokom i kakame wiriwir, akadi igerunu ude wu i diere me acerin, ango abino wano wu piny ki kunono.

⁵ “Ka jokuwo oko bino iwor di gin kiko yak, gin kitero gikame gin oudo kimito kenekene. Ka jo ngwedo olok, mam kiweko mogo? Do wun jokwor wu bino tieko wu pitipit.

⁶ Ikwae ka Esau, kobino pekeso kabedere wu dedede di oko yako jamini wu kabeco.

⁷ Jo kame wun ikoderenu kede gi bino ngalo wu, gin kibino riamo wu tenge ki piny wu. Jo kame wun oudo iwinyerenu kede gi bino lokere yi kede wu di kiko bwono wu. Jo kame wun oudo icamunu kede gi karacel bino lokere ciko ne wu obek, di wun likame ingeunu gimoro iye.

⁸ “I ceng kame ango abino mino kede jo Edom alola, ango abino muducaro jo ariek kikom gi di ako tieko rieko gi dedede.

⁹ Jo yi me bomba me Teman lworo atek bino mako, di oko bino neneko isirikalen me Edom dedede.”

Gi komio Edom bino oudo Alola

¹⁰ Rwot waco be, “Ango abino timo manoni piento wun ikounu yako imiegu wu di ikounu neneko gi, gin ikwae ka Yakobo; kobino muducaro wu di oko bedo mino wu lewic nakanaka.

¹¹ I ceng nono wun bin ikounu cungo tenge, di jokwor turo irutei me Yerusalem. Wuda oudo iracunu bala jokumbor nogo, jo kotero abar me Yerusalem di kiko popoko kede uco alulu.

¹² Wun oudo koto bin likame ilelunu i wi imiegu wu me Yuda i ceng kame winyo arac opoto negi kede. Likame wun oudo ipoorenu lelebo i wi jo me Yuda i ceng kame peko opoto negi kede. Likame wun bin ipoorenu nyero gi i kare kame kitie neno kede can.

¹³ Likame wun bin ipoorenu donyo i bomba ka jo na i ceng kame gin bin kitie kede i peko. Wun likame bin ipoorenu konyo jo lelebo i wi jo Yuda, i ceng kame bin kitie neno kede can. Wun likame koto bin iyakunu abar gi i ceng kame gin oudo kitie kede i peko.

¹⁴ Wun likame oudo ipoorenu cungo i akarakara me yote pi mamako jo kame oudo tie bwot. Likame wun oudo ipoorenu mino gi i cing jokwor i ceng kame oudo kitie kede i peko.”

Rubanga bino Ngolo Kop ne Atekerin

¹⁵ Rwot waco be, “Ceng odoko iyapiyapi kame ango Rwot, abino ngolo kede kop ne atekerin dedede. Edom, gikame in itieko timo nono en kame kobino timo ne ida. Gikame in itimo nono bino dwogo i wii.

¹⁶ Jo na otieko mato ikopo me lilo na, ki wi moru na kacil. Aso, atekerin dedede kame kio kede gi bino gida mato gikame romo gi; di kiko doko li atwal.”

Jo Isirael bino Bwono Jokwor gi

¹⁷ “Do i wi moru me Sion, jo kame bino bwot bino bedo tie, di en eko bino doko kabedo kacil. Ikwae ka Yakobo bino riamo tenge jo koudo omao lobo gi.

¹⁸ Ikwae ka Yakobo kede me ka Yosepu bino bedo cal bala mac; di ikwae ka Esau kobedo bala arienge; gin kibino muducaro ikwae ka Esau bala kame mac wango kede arienge. Likame tie akwar Esau moro kame bino dong kuo. Ango Rwot, en awaco.

¹⁹ “Jo me bad tetu piny me Yuda bino bedo Edom; jo me bad mori me tetu tim bino mako Pilistia; Adulion me Epuraimu kede Samaria bino doko me jo Isirael; jo ka Benjamin bino tero Gilead.

²⁰ Jo Isirael kame tie Kala bala mabus bino dwogo di gin kiko mano lobo me Poenisia ape tuno Sarepat i bad tetu malo. Jo me Yerusalem kame tie Separad bala mabus bino mano bomban me bad tetu piny me Yuda.

²¹ Jo kame Rwot olako bino ot i moru me Sion di gin kiko pugo jo Edom. Di Rwot kikome en kame ko bino bedo Abaka.”