Ngarab kop 7 - Baibuli I Leb Kumam 2013

Par i kom Kuo

¹ Nying aber lo mo angwe kur me wel, doko ceng me to ka dano ber lo ceng me nywale.

² Ot kabedo kame jo tie koko iye dano oto ber elo ot kabedo kame kotie camo iye ebaga; pien to en ajikini me jo dedede, jo akuo miero kur wi gi wil kede.

³ Cwercuny ber elo nyero; ebo, en etwero mino nyim dano rurujun, do eyabo tam mere.

⁴ Ngat ariek tamo kop i kom to; do cuny ngamingo paro kop i kom yomcuny.

⁵ Eber winyo kop kame jo ariek bunano in kede elo winyo wer kame jomingo paki kede.

⁶ Ka ngamingo nyero, ecal bala okuto kame mwomwocun i mac. Nyero nono kony mere li.

⁷ Ateteni ngat ariek ka odonyo tero jo kirac, edoko ngamingo, doko cemusana dubo tam me dano.

⁸ Ajikini me gimoroni ber elo acakini mere. Dire ber elo ewaka.

⁹ Kur ililo awakawaka, pien jomingo en kame mako lilo i cuny gi.

¹⁰ Kur ipenyere be, “Pinyo kara komio kare kokato oudo ber elo kare kanataman?” Peny nono likame obedo peny me ngat ariek.

¹¹ Rieko ber bala jamini alunya; en eber ne jo akuo.

¹² Pien rieko gwoko dano bala sente. Rieko gwoko kuo me dano kame tie kede, manoni en bero me bedo kede ngec.

¹³ Tam kong i kom gikame Rubanga otieko timo; ngai kame twero rieno gikame en etieko mino ogom?

¹⁴ I kare kame in itie kede kiber poore ibed kede yomcuny; ka peko obino, poore iyutuno be Rubanga otieko keto ceng me yomcuny kede ceng me peko, tetekeny jo kur ngei gikame bino timere icen.

¹⁵ Ango atieko neno gi dedede i kare me kuo na kame kony mere li noni; tie jo mogo abeco kame to i timo gikame poore, doko tie jo kame timo gikareco di kiko bedo kuo pi kare kalac i tim gi areco nogo.

¹⁶ Aso, kur ibed dano kame ber bero kokato kare arabo kame riek kitek ateka; pinyo kamio ineko komi?

¹⁷ Kur ibed dano kame rac raco kokato kare, doko kur ibed ngamingo; pinyo kamio in ipoore to di pwodi kare ni li oromo?

¹⁸ Eber ne in lide i kom acel, abongo weko ocelu da; pien ngat kame lworo Rubanga bino bedo tie kede gin are nogo dedede.

¹⁹ Rieko mio ngat ariek teko kame kalamo teko me jopug tomon me bomba.

²⁰ Ateteni likame tie ngatamoro kopoore i piny kan, kame timo gi kopoore esawa dedede abongo timo dub moro akadi acel.

²¹ Kur iciko yiti i kom kope dedede kame jo waco, cengemogo itwero winyo ngatic ni di etie lami;

²² di ida ingeo i cunyi be tien atot ibedo lamo jo icegun.

²³ Ango atio kede rieko na me tamo gi nogi dedede. Ango oudo awaco be abino bedo riek, do rieko oko bedo bor kibuta.

²⁴ Ateni me jamini dedede tie kakabor kede wa, kakatut, ngai kame twero niang iye?

²⁵ Ango ako lokere keto cunya mito bedo kede ngec kede isoma; oudo amito udo rieko kede adwokini me kope kame oudo ango apenyere iye, kede oudo amito ngeno be tim areco obedo mingo kede da be mingo obedo poi.

²⁶ Ango ako udo gimoro kame lit kalamo to. Manono en dako kame cal bala obek. Amara mere buti cal bala owic kede bwoi; ka egwaki, cinge cal bala epingo. Icuo kame yomo cuny Rubanga twero bwot kibute, do ngadubo en ebino mako.

²⁷ Nenunu, manoni en gikame ango ako udo, acoko gi mot mot i kare kame oudo atie mono kede adwokini me kope kame oudo abedo penyere i kom gi.

²⁸ Ango abedo mono adwokini me peny na nogo do likame ako udo moro. Ango audo icuo acel aber kikom cuo tutumia acel (1,000), do dako aber likame audo akadi acel.

²⁹ Manoni en gi acel kenekene kame ango ako niang iye, en be Rubanga ocweo jo di kibeco, do jo en kame oko kelo alokaloka i kom gi ken gi.