Ngarab kop 6 - Baibuli I Leb Kumam 2013

¹ Tie gimoro arac kame ango atieko neno i piny kan, doko etie peko but jo dedede.

² Rubanga romo mino dano moro abar, jamini, kede wor, di likame eko bedo kede rem i kom gimoro dedede kame cunye mito, do di Rubanga likame ko mine camo abar mere nono, do dano moro apat en kame lunyo camo gi. Manoni da kony mere li, doko etie gikame rac twatwal.

³ Dano romo nywalo idwe tol acel, di eko bedo kuo pi kare kalac, do akadi en ebed kuo tieko kare karom amene, ka en likame eko bedo kede yomcuny i kom jamini abeco me kuo noni, arabo di likame oko yike, ango awaco be atin kame onywalo di oto, ber loe.

⁴ Pien atin nono obino i kuo akony mere li noni di eko raso i colo, kabedo kalikame koyutuno en iye atwal.

⁵ En udo likame eneno wang ceng, doko udo likame engeo gimoro, do en tikatika udo etieko udo wei, elo dano ca.

⁶ Dano nono akadi koto bed kuo pi mwakini tutumia are, do di en likame eko camo bero moro, atin kame konywalo di otieko to ber loe. Benyo, likame gin jo are nogo kioto kabedo acel?

⁷ Lole kame jo timo dedede tie pi yi gi, do likame tie gikame romo gi.

⁸ Nyo kame joariek lo kede jomingo? Bero nyo kame jocan udo pi ngeno epone me bedo kede jo icegun?

⁹ Eber ne dano pi mino jamini kame etie kede rome, elo bedo ngobelo jamini apat. Manoni da cal bala buongor arabo riamo yamo.

¹⁰ Gimoroni kame timere nan, oudo kotieko moko sek be ebino bedo tie. Wan jo ongeo cal wa, wan likame okaruno piem kede ngat kame tek lo wa.

¹¹ Duro kop adura kony mere li. Kara nyo aber twatwal kame dano udo i duro kop?

¹² Ngai kame ngeo gikame ber ne jo pi kare acecek me kuo gi kame kony mere li noni, kuo kame gin kibeo iye abea bala tipo noni? Ngai kame ngeo gikame bino timere i piny kan icen me wan to?