Ngarab kop 12 - Baibuli I Leb Kumam 2013

¹ Yutuno Ngacwec ni di pwodi in eponga, di pwodi kare me peko li otuno, kare kame in ibino waco kede be, “Likame tie gimoro akadi acel kame yomo cunya.”

² Manono en kare kame in ibino neno kede ceng, duwe, kede acerin di warawara, do di udo idoun me kot pwodi likame odwogo;

³ kare kame badi kobedo gwoki bino donyo miel kede teltel, di tieni kame nataman tek, odoko goro. Laki udo odoko nonok likame kikaruno nyamo cam, doko wangi da udo odoko mwadamwada.

⁴ Kare kame yiti likame bino winyo kede kop kame koyamo i yote, doko likame ibino winyo kiber mor me kidi kame tie riego, arabo wer; do akadi koko me winyo bino ceni ki wang nino.

⁵ Kare kame in ibino lworo kede kabedere kimukurur, doko da ot ki yongayo bino bedo gikame twero kelo ni peko. Yer wi bino doko tar; ibino ware awaa kede ot, doko mit dedede me cunyi bino tiek. Pien jo dedede miero ot i paco gi kame kibino bedo iye nakanaka, di jo akoko jo oto ko bino bedo tie i yote me bomba.

⁶ Tol kame kotimo kede siliba bino cot, kede bakuli kame kotimo kede saabu bino to, doko jagi me pii kobino bebelo i atan, kede namisiga me wano pii ki atan ko bino tur.

⁷ Pien kom wa bino dok i apua kakame bin kokwanye kiye, di wei me kuo ko bino dok but Rubanga ngat kame bin omie but wa.

⁸ Ngarab kop oko waco be, gi dedede kony gi li. Kony gi li atwal atwala.

Kope me Ajikini

⁹ Do pi kite kame Ngarab kop oudo obedo kede ngat ariek, en eko bedo pwonyo jo gikame en oudo engeo. En ebedo ngingico agole atot, di eko coko gi i yore i yore.

¹⁰ Ngarab kop oko tamo mono kope kame yomo cuny jo, di eko wandiko kope me ateni iepone kame niangere.

¹¹ Kope me jo ariek cal bala ebela abit kame jokwai romini leko kede romini, doko kope me agole kame kotieko coko bedo pi kare kalac bala sumalin kame koguro kitek. Rubanga, Ngakwat wa acel, en komio kope nogo.

¹² Atin na, gwokere kur ilol komi i kope mogo apat kede magonogi. Wandiko itabun likame jik, doko isoma atek bino olo komi.

¹³ Ingei magonogi dedede, kop me ajikini ine; bed kede wor but Rubanga, doko lub cik mege, pien manono en gikame jo dedede miero timi.

¹⁴ Pien Rubanga bino ngolo ne jo kop i kom gi dedede kame gin kitimo, akadi gikame kitimo i mung, abeco arabo areco.