Ngarab kop 11 - Baibuli I Leb Kumam 2013

Gikame Dano Ariek Timo

¹ Ket sente ni i cato wil kede pinye apat, pien ingei kare moro ibino ude.

² Popoko gikame itie kede tien kanyaare arabo kanyauni, pien likame ingeo peko kame romo poto i lobo.

³ Ka idoun oyiyilo, kot bino cwei. Yat akadi poti i bad tetu piny arabo i bad tetu malo, en ebino dong buto kanono kakame epoto iye.

⁴ Ngat kame bedo daro yamo pi loko buko kiber, kede idoun bedo tie iepone kopoore, likame bino cuno kodi arabo kano kac moro.

⁵ Bala kite kalikame in ingeo kede epone kame yamo me wei donyo kede i kom atin i yi toto mere, kamanono da in likame ikaruno ngeno gikame Rubanga, ngat kocweo jamini dedede timo.

⁶ Cui kodi ni odiko, doko otieno da kur ibed abeda abongo timo tic; pien in likame ingeo mene en kame bino wok kiber, me odiko arabo me otieno, amoto gin dedede kibino bedo ber.

⁷ Lero me ceng ber, doko tuno dano neno wang ceng anyen tie gi me yomcuny.

⁸ Akadi jo kame bedo kuo pi mwakini atot poore bed kede ilel i mwakini nogo dedede. Do poore kiyutuno be mwakini gi me bedo i piny acol bino bedo tot twatwal. Likame tie gimoro kame gin kigeno pi udo.

Acora but Jo Atino

⁹ Wun jo atino, bedunu kede kilel, di ikounu camo kuo di pwodi wun ipongai kede apongai. Timunu gikame cuny wu mito kede kame wangu pwoyo. Do poore ingeunu be Rubanga bino ngolo ne wu kop pi gi nogo dedede.

¹⁰ Kwanyunu par tenge ki kuo wu, kede gimogo kame mio komu lito; pien likame ibinunu dong joatino pi kare alac.