Ngarab kop 10 - Baibuli I Leb Kumam 2013

¹ Lwangini kototoun imo angwe kur mie edoko ngwe tulutul, kamanono da mingo moro atitidi dudubo twon rieko kede wor.

² Cuny dano ariek tie i kom timo gikame poore, do cuny ngamingo tie i kom timo gi kalikame poore.

³ Akadi di ngamingo tie ot i yongayo, udo tam mere li, en emio jo dedede ngeo be en eming.

⁴ Ka ngapug odoko ger ni, kur iyai di iko weko tic ni; bedo mot bino mino kosasiro dub adongodongo kame oudo itimo.

⁵ Tie gikarac kame ango aneno i piny kan, en tim kalikame poore, kame jopug timo.

⁶ Jo amiming en kame koketo i ruom amalo, do jo abeco komio ruom apiny.

⁷ Ango atieko neno ipasoi di tie ingei asigiran, di jo kame koworo tie ot kede tien gi bala ipasoi.

⁸ Ngat kame kunyo bur bino poto i bur kame en ekunyo nono; doko ngat kame belo ki apama, twol bino tonge.

⁹ Ngat kame kunyo engaro, engaro bino mine awanon. Ngat kame belo yen, yen bino wanakino en.

¹⁰ Ka le okuku, di in likame iko pene, poore iket teko adwong ka iyaro tic kede; do rieko konyo dano cobo timo gimoro kiber.

¹¹ Ngeno epone me babango twole likame tie kede kony moro buti, ka twol okai di pwodi likame ibabango en.

¹² Kope kame ngat ariek waco kelo ne wor, do jomingo kope me dog gin en kame muducaro gi.

¹³ Gin kicako kede yamo kope me mingo, di i atiekini mere kope gi nogo ko doko rom aroma kede me ngat kopoi.

¹⁴ Ngamingo duro kope adura. Likame tie ngat kame ngeo gikame bino timere i kare me anyim. Ngai kame karuno waco ne wa gikame tie pirwa i kare me anyim?

¹⁵ Lole me jomingo mio kom gi ol, pien gin likame kingeo akadi yongayo me aluba.

¹⁶ Piny kame abaka mere obedo eponga tie i can, di jotel mege bedo camo ebaga iwor kiakia.

¹⁷ Do piny kame abaka mere obedo wot ka ngat kame koworo, tie kede yomcuny, di jopug mege camo ebaga i kare kopoore, pi udo teko, do likame pi amera.

¹⁸ Ka dano nyap nyapo kalikame etwero temuno kede wi ode, ot nono bino cwer di eko poto.

¹⁹ Ibagai kotimo pi yomo cuny, doko bwini mio cuny dano doko yom, do sente timo gi dedede kame mitere.

²⁰ Kur iyamo kirac i kom abaka, akadi eliling i cunyi, arabo i kom ngat kobaro, akadi i agola ni me buto. Winyo moro romo winyo kop nono di eko tero eoto tatamo.