Ngarab kop 1 - Baibuli I Leb Kumam 2013Kony me Kuo li 1 Magonogi en kope me Ngarab kop, wot Daudi abaka me Yerusalem. 2 Jamini dedede cal bala buongor, kony gi li atwal atwala! Manoni ngarab kop en owaco. Likame tie gimoro kame kony mere tie. 3 Nyo kara kame dano udo i cane mege me timo tic kede teko i piny kan? 4 Lwak me jo bino di kiko kato, lwak ace di bino lunyo wang gi, do lobo dong kamanono nakanaka. 5 Ceng wok, di eko donyo, di eko susunyo dok kakame ewok kiye. 6 Yamo buko eoto i bad tetu piny, di eko lokere buko eoto i bad tetu malo; en ebuko ewiwirun kamanono, tuno en dok kakame oudo ecakere kiye. 7 Icileta dedede mol kioto i nam adwong, do nam adwong pwodi likame opong. Pii dok i icileta bobo, di kiko cako bobo mol ot i nam adwong. 8 Gi dedede olo dano, kikelo olo kalikame wacere. Wang dano likame yeng kede nen; yit da winyo kope likame rome. 9 Gikame lem tie, en kame bino bedo tie. Doko gikame lem kotimo, en kame bobo kobino timo; likame tie gimoro anyen i piny kan. 10 Benyo, tie gimoro anyen kame kokaruno waco be, “Neningo, gini nyen”? Li kom, pien udo etieko timere sek di pwodi likame konywalo wan. 11 Likame tie dano moro me kare kasek kame bobo koyutuno, akadi jo kame kobino nywalo da, jo kame bino lunyo cen ngei gi likame bino yutuno gi. Mono Rieko da Gimoro li 12 Ango Ngarab kop, i kare kame bin ango apugo kede bala abaka me Isirael i Yerusalem, 13 ako tamo kede rieko na dedede pi mito niang gi dedede kame kotimo i piny kan. Rubanga otieko mino jo tic atek me lole, kalikame kelo negi yomcuny. 14 Ango atieko neno gi dedede kame jo timo i piny kan, neningo, gin dedede kical bala buongor, arabo riamo yamo. 15 Gi kotieko gom, likame kokaruno rieno; gikame li, likame kokaruno maro wel mere. 16 Ango ako waco i cunya kena be, “Ango atieko udo twon rieko, kame kalamo me jo dedede kogeo pugo Yerusalem di pwodi ango. Rieko kede ngec likame nyen kibuta.” 17 Ango ako keto tam na mito ngeno rieko, poi, kede mingo. Ango ako udo be manoni da cal bala riamo yamo. 18 Pien ka in iriek twatwal, ibedo da kede par atot; ka ngec nin meede, cwercuny ni da meede. |
Baibuli I Leb Kumam © Bible Society of Uganda, 2013.
Bible Society of Uganda