Nekemia 9 - Baibuli I Leb Kumam 2013

Jo Otuco Dub gi

¹ I buto duwe ot are kiwie ongwon me duwe nono, jo Isirael bin oko cokere pi bedo i kanyo kec. Gin oudo kingapo igoen me iturur, di kijuko wi gi kede apua pi nyuto cwercuny gi pi dub gi.

² I kare nono gin oudo kitieko pokere kikom jokumbor. Gin bin kiko cungo di kiko tuco dub gi kede me ka joakwari gi.

³ Gin kiko bedo cungo acunga pi isawan aromo adek di kotie somo negi Iswil ka Rwot Rubanga gi, di bobo pi isawan aromo adek gin kiko bedo tuco dub gi di kiko da woro Rwot Rubanga gi.

⁴ Di do Yesua, Bani, Kadamiel, Sebania, Buni, Serebia, Bani, kede Kenani oko cungo kakimukurur kame koiko pi Jolebi, di gin kiko lego but Rwot Rubanga gi kede dwan amalo.

⁵ Di Jolebi nogi: Yesua, Kadamiel, Bani, Kasabaneya, Serebia, Kodia, Sebania, kede Petakia oko waco ne jo be, “Yaunu icungunu malo di ikounu pako Rwot Rubanga wu, pakenu ikar kede ikar! Pakunu nyinge me deyo, bed bala en edwong likame tie pak moro kame rome.”

Ilega me Tuco Dub

⁶ Esera oko lego kaman: “In keni en ibedo Rwot; in icweo malo kede acerin lung kame tie i edou. In icweo lobo kakotuo kede nam, kede jamini dedede kame tie i yi gi; in en imio kuwo but gin dedede. Gi dedede kame tie i malo wori.

⁷ Okwe Rwot Rubanga, in bin iyero Aburam di iko kwanye ki Ur kabedo kame bin tie Babilon; in bin iko loko nyinge be Aburaam.

⁸ In bin iko udo be en ebedo dano kame genere buti, di in iko timo kede en isikan. In icikere bute be ibino mino en kede ikwae mege lobo me jo Kanan, jo Kiti, jo Amor, jo Perisi, jo Yebu kede jo Girigas. In nataman icobo cikere ni, piento in igenere.

⁹ “In bin ineno kite kame joakwari wa oneno kede can i Misiri; in bin iwinyo koko gi i Nam Akwar.

¹⁰ In bin itimo gianena mogo kede jamini me aura i nyim Parao, kede i nyim jotic mege kede jo dedede me lobo mere, piento in oudo ingeo be gin kibedo tero joakwari wa kirac. Manono bin oko mino nyingi obedo iruo tuno tin.

¹¹ In bin imio pii opokere i dier nam pi yabo yongayo ne jo ni, tetekeny gin kibei ki kakotuo i dier nam. In imio jo kame bin tie wapo gi omwony i dier nam kakatut, bala kame kidi lwiny kede i nam.

¹² In bin i dier iceng itelo joakwari wa kede edou, di iwor iko menyo ne gi yongayo kede mac.

¹³ In bin iyai ki malo di iko bino piny i moru me Sinai; in iko yamo kede jo ni di iko mino gin iswilia me ateni, pwony kede cik abeco.

¹⁴ In bin ipwonyo gi gwoko Sabato ni kacil, di iko mino ngatic ni Musa omio gi cik, pwony kede iswilia ni.

¹⁵ “I kare kame bin kec oneko gi kede, in imio gi cam koyai ki malo, kede i kare kame bin orio oneko gi kede, in imio pii owok negi ki lela. In bin iko waco negi be kioti di kiko gamo lobo kame in bin icikere pi mino gi.

¹⁶ Do joakwari wa bin oko bedo kede ewaka kede epali di gin likame kiko lubo cik ni.

¹⁷ Gin bin kiko dagi lubo cik nin; wi gi owil kede jamini me aura kame bin in itimo i diere gi. Gin kitimo epali di kiko yero ngatel pi dwoko gi ipasun Misiri. Do in ibedo Rubanga kame sasiro jo; in ingakisa doko itie kede amara, likame in isusunyo lilo. In idwong kede amara kalikame lokere; in bin likame iko jalo gi.

¹⁸ Akadi kakame gin bin kicweo kede cal me roya di kiko waco be manono en kame bin obedo rubanga kokwanyo gi ki Misiri, akadi di manono bin obedo twon dub kede anywar buti,

¹⁹ in pi kisa ni adwong likame iko jalo gi i wi tim. In bin likame ikwanyo tenge edou arabo mac kame bin nyuto ne gin yongayo iceng kede iwor.

²⁰ In bin pi bero ni imeede kede pwonyo gi, di ipito gi kede emana kede imio gi pii me amata.

²¹ Pi mwakini ot ongwon kame gin kitieko i wi tim in ibedo mino gin gi dedede kame bin mitere negi; igoen gin bin likame oko ti, doko tien gi da likame bin oko popongun.

²² “In bin imio gi kibwono atekerin kede ajakanuto atot, di in iko popoko negi lobere gi. Gin bin kimao lobo ka Abaka Sikon me Kesibon, kede lobo ka Abaka Og me Basan.

²³ In bin imio ikwae gi onyai di kiko doko tot bala acerin kame tie malo i edou, di in iko tero gi i lobo kame bin in icikere iye pi mino joakwari gi.

²⁴ Gin bin kiko ot di kiko mano lobo nono oko doko mergi; in ibwono jo kame bin tie bedo i lobo nono. In bin iko mino jo me Kanan kede abakai gi i cing gi, pi gin timo negi gikame cuny gi mito.

²⁵ Gin bin kiko mano bomban kame kocelo di tek, kede lobo amio, ude kopong kede jamini abeco, ataparin kame kotieko kunyo, poti me olok, poti me olibeti kede yen atot me anyakini. Gin bin kiko cam di kiko yeng di do kiko cwe; cuny gi bin oko bedo yom pi twon jamini abeco kame in bin iko mino gi.

²⁶ “Akadi kamanono da, gin bin kiko dagi lubo kop nin di kiko jemo ni, gin kiko loko ngei gi ne iswil ni. Gin kiko neneko inabin ni kame bin kwenyaro gi, be kilokere di kiko dwogo buti. Gin bin kiko timo anywar atek buti.

²⁷ Manono oko mino in bin iko mino gi i cing jokwor gi, di jokwor gi oko mino gi kineno can. I kare kame do gin bin kitie kede i peko, gin kiko kok buti pi konyo gi in bin iko winyo koko gi ki malo kabedo ni. In pi kisa ni adwong iko mino gin jotel kame oko lako gi ki cing jokwor gi.

²⁸ Do i kare kame gin kinapakin kede, gin bobo kiko timo dub i nyimi, in bobo iko jalo gi i cing jokwor gi, di gin kiko pugo gi. Akadi kamanono da, i kare kame gin kiko swilaro kede di kiko koko buti, in bin iwinyo koko gi ki malo di pi kisa ni iko bedo lako gi tien kede tien.

²⁹ In bin iko kwenyaro gi pi dwoko gi lubo iswil ni, do gin kiko wakere di kiko dagi lubo cik nin, gin kibedo turo Iswil ni, aso di en ebedo yongayo kame tero jo i kuo. Gin kiko timo epali di kiko meede dagi lubo Iswil nin.

³⁰ In bin ibedo dire di ikwenyaro gi pi mwakini atot. In ibedo mino inabin ni kop pi waco negi, do gin kiko dagi winyo, manono oko mino in imio gi i cing atekerin apat.

³¹ Akadi kamanono da, in pi kisa ni adwong, likame iko jalo gi arabo muducaro gi. In ibedo Rubanga kame ngakisa!

³² “Pi mano, Okwe Rubanga wa, in Rubanga kame dwong, in itek doko in iyiliyili! In igwoko isikan kede amara ni kalikame lokere. Kur imi can kame wan obeo iye bed bala gi kalikame pire tek kibuti! Cako i kare me abakai me Asiria tuno tin, wan kede abakai wa, jotel wa, josaseredoti kede inabin wa, joakwari wa, kede jo ni dedede, obedo neno can.

³³ In itimo gikame opoore pi mino wan alola, in idong di igenere, bed bala wan obedo timo gikareco.

³⁴ Joakwari wa, abakai wa, jotel wa, kede josaseredoti wa likame ogwoko Iswilia ni. Gin kidagi winyo cik kede ikwenyar kame in bin imio gi.

³⁵ Akadi i kare kame gin bin kitie kede i ajakanuto gi, gin likame kiko timo tic ni bed bala in ibedo nyuto negi bero ni adwong. In bin imio gi lobo alac di emio, do gin likame kiko weko dub gi, doko likame kiko timo tic ni.

³⁶ Aso, nataman wan ige otie ipasoi i lobo kame in bin imio joakwari wa, pi gin camo cam kame dongo iye kede pi gin bedo kede ilel pi jamini mege abeco.

³⁷ Nataman cam kame cek i lobo noni abakai en atero, gin jo kame in imio pugo wa pi dub wa. Gin kitie kede twer i kom wa kede i kom doke wa, gin kitimo ne wa gikame cuny gi mito, manono omio wan otie kede cwercuny adwong.”

Jo Oketo Cing gi i Kop me Winyere

³⁸ Pi gikame obedo timere nogo dedede, wan nataman ocikere kitek i iwandik, di jotel wa, Jolebi wa, kede josaseredoti wa ko bino keto cing gi i cikere noni.