Nekemia 3 - Baibuli I Leb Kumam 2013

Temuno Gero Apama me Yerusalem

¹ Man en epone kame bin kotemuno gero kede apama me bomba. Eliasib Ngatel me Josaseredoti kede josaseredoti jowote en oiko gero Erute me Romini. Gin kiko kwere di kiko keto ikekon mege. Gin kiko kwere but Rwot paka tuno i Gedo abor malo me Tol Acel, ape ape paka tuno i Gedo abor malo me Kananel.

² Cuo me Jeriko oko gero dul kame lubo manono. Di Sakur wot ka Imiri oko gero dul kame lubo.

³ Awobe ka Kasena en oko gero Erute me Aporogo; gin kisisipo ipirin mege di kiko keto ikekon mege, alorito kede agilun me cego gi.

⁴ Meremot wot ka Uria, akwar Kakos en oko gero dul kame lubo mergi. Di Mesulam wot ka Berekia, akwar Mesesabel en oko gero dul kame lubo manono. Di Sadoki wot ka Bana en oko gero dul kame lubo manono.

⁵ Cuo me Tekoa en oko gero dul kame lubo kanono, do jotel me bomba gi oko dagi tic atek kame oudo kopoko negi.

⁶ Yoyada wot ka Pasea kede Mesulam wot ka Besodeya oko temuno gero Erute Kacon; gin kisisipo ipirin mege di kiko keto ikekon mege, alorito kede agilu me cego gi.

⁷ Melatia me Gibeon, Yadon me Meronot, kede cuo me Gibeon kede Misipa en oko temuno gero dul kame lubo, ape ape paka tuno kakame ngapug me adul me bad tetu tim me ecilet me Eupurate oudo buto iye.

⁸ Kakame lubo mergi Usiel wot ka Karakaya, ngatet saabu, en oko gero. Kanania, ngat kame oudo cweo moe angwe kur, en oko gero dul kame lubo, ape ape paka tuno i Apama Alac.

⁹ Repaya wot ka Kur, ngat koudo pugo dul me Yerusalem en oko gero dul kame lubo.

¹⁰ Yedaya wot ka Karumap en oko gero dul kame lubo, kame oudo iyapi kede ode. Katus wot ka Kasabaneya en oko gero dul kame lubo.

¹¹ Malikija wot ka Karim kede Kasub wot ka Pakat Moab en oko gero dul kame lubo kede Gedo abor malo me keno me tedo mugati.

¹² Salum wot ka Kalokesi, en ngapug me dul ocelu me Yerusalem, en oko gero kakame lubo. (Anyira mege okonye timo tic nono.)

¹³ Kanun kede jo kame bedo i bomba me Sanoa en oko temuno gero Erute me Aditot. Gin kigere di kiko keto ikekon mege, alorito kede agilun me cego gi, di kiko temuno gero apama kakame boro mere romo mita tol ongwon kede ot ongwon (440), kame riere ape ape paka tuno i Erute me Yugi.

¹⁴ Malikija wot ka Rekab, ngapug me adul me Bet Kakerem en oko temuno gero Erute me Yugi. En egere di eko keto ikekon mege, alorito kede agilun me cego erute nono.

¹⁵ Salum wot ka Kolokose, ngapug me adul me Misipa en oko temuno gero Erute me Atan. En eumo kanono di eko gero erute di eko keketo alorito kede agilu me cege. Ki Atapar me Sela, en egero apama kame gongere kede poto me abaka, ape ape paka tuno kayito piny ki Bomba ka Daudi.

¹⁶ Nekemia wot ka Asabuk, ngapug me dul me Betesur en oko gero kakame lubo, ape ape paka tuno i ates ka Daudi, i atapar kede i paco me isirikalen.

Jolebi kotimo Tic me Gero Apama

¹⁷ Jolebi kotimo tic me gero apama gin en: Rekum wot ka Bani en oko gero kakame lubo; Kasabia ngapug me dul me Keila en oko gero kakame lubo di ecungo kawang adul kame en epugo.

¹⁸ Babai wot ka Kenadad, ngapug me dul ocelu me Keila en oko gero dul kame lubo.

¹⁹ Eser wot ka Yesua, en ngapug me Misipa en oko gero dul kame lubo, i nyim ot me kano jamini me yi, ape ape paka tuno kakame apama goo kiye kona.

²⁰ Baruk wot ka Sabai en oko gero kakame lubo, ape ape paka tuno kakame donyo i ot ka Eliasib Ngatel me Josaseredoti.

²¹ Meremot wot ka Uria, akwar Kakos en oko gero dul kame lubo paka tuno kakame ot ka Eliasib jik iye.

Josaseredoti kotimo Tic me Gero Apama

²² Magi en josaseredoti oko timo tic me gero apama: Josaseredoti me adulion koluko Yerusalem en oko gero kakame lubo;

²³ Benjamin kede Kasub en oko gero kakame lubo, kame oudo tie i nyim ude gin. Asaria, wot ka Maseya, en akwar Anania, en oko gero kakame lubo, kame oudo tie i nyim ode;

²⁴ Binui wot ka Kenadad en oko gero kakame lubo, cako ki ot ka Asaria tuno kakame apama goo kiye kona;

^25-26 Palal wot ka Usai en oko gero kakame lubo, cako ki esonda me apama kede gedo abor malo atie i paco ka abaka me kakokiar i nget diakal me jodar. Pedaya wot ka Paros en oko gero kakame lubo, paka tuno karamoro i bad tetu kide i nget Erute me Pii kede gedo abor malo me daro tempulo. (Manoni oudo tie i nget dul me bomba kakame kolwongo be Opel, kakame jotic me tempulo oudo bedo iye.)

Jogedo Ace

²⁷ Jo me Tekoa en oko gero kakame lubo, cako ki karamoro apimere kede gedo abor malo di edwong, en gedo me daro tempulo, paka tuno i apama kame tie i nget Opel; manono en dul me are kame gin kigero.

²⁸ Ekodet me josaseredoti en oko gero dul kame lubo, dok i bad tetu malo cako ki Erute me Asigira, di ngat acelacel gero dul kame tie i nyim ode.

²⁹ Sadoki wot ka Imer en oko gero kakame lubo, kame oudo tie i nyim ode. Semaya wot ka Sekania, ngat kame oudo daro erute me bad tetu kide, en oko gero kakame lubo.

³⁰ Kanania wot ka Selemia kede Kanun, en awobi me kanyape ka Salap en oko gero kakame lubo, manono oudo obedo gedo gi me tien me are. Mesulam wot ka Berekia en oko gero kakame lubo, kanono oudo tie i nyim ode.

³¹ Malikija, ngatet jame kede saabu, en oko gero kakame lubo, ape ape paka tuno i ot kame jotic me tempulo kede jocat wil tio kede, kame oudo pimere kede dog Erute me Mipikad, i nget agola atie malo i wi kakame apama goo kiye kona, i bad tetu malo me bad tetu kide.

³² Jo kame teto jame kede saabu kede jocat wil en oko gero dul me ajikini, cako ki agola kame tie i kakame apama go kiye kona paka tuno i Erute me Romini.