Nekemia 13 - Baibuli I Leb Kumam 2013

Pokere kede Jokumbor

¹ Cenge nono di oudo kotie somo itabu ka Musa ne jo, gin kiko udo kakame kowandiko be likame tie dano moro kikom jo Amon arabo kikom jo Moab kame miero ribere i kom jo ka Rubanga.

² Kotimo kamanono pien gin bin kidagi mino jo Isirael cam kede pii i kare kame bin kitie kede i yongayo me wok ki Misiri. Akaka manono gin bin kiko lokere wilo Balaam pi lamo jo Isirael, do Rubanga wa bin oko loko ilam nono oko doko winyo but wa.

³ Kakame jo Isirael bin owinyo kede iswil noni, gin kiko cako pokere kede jo dedede kame bin obedo ikwae me jokumbor kame oudo tie i kom gi.

Alokaloka Abeco kame Nekemia Otimo

⁴ Di pwodi likame manoni otimere, ngasaseredoti Eliasib, ngat kame bin koketo pi telo kop amako agolai me kano jamini i ot ka Rubanga wa, pi kare alac en oudo ebedo kiber kede Tobia.

⁵ En bin eko iiko agola alac di eko mino Tobia pi tic kede. Agola nono oudo sek ber kotio kede pi gwoko giayala me engano kede me odok angwe kur, jamini kame kotio kede i tempulo, acel me tomon me engano, bwini, kede mo me olibeti kame komio but Jolebi, jower kede jodar irutei, kede jamini kame komio but josaseredoti.

⁶ I kare kame manoni bin tie timere kede, ango oudo ali i Yerusalem, pien i mwaka me ot adek kiwie are me apugan ka Aretasereses bala abaka me Babilon, ango ako dok bute pi dwoko ne kop. Ingei kare moro ango ako kwano akarunikin kibut abaka

⁷ di ako dok Yerusalem. Ango bin ako ngeno gikarac kame Eliasib oudo otimo pir Tobia, kame en eoto iiko ne kede en agola i tempulo.

⁸ Ango bin ako doko ger twatwal di ako lwolwomo jamini ka Tobia dedede ooko.

⁹ Ango di ako mino cik be miero lony agolai nogo di oko dwoko iye jamini kame bin kotio kede i ot ka Rubanga, engano me giayala, kede odok angwe kur.

¹⁰ Ango doko bin ako niang be likame oudo obedo mino Jolebi iner me jamini kame oudo kopoore mino gi; pi manono, gin kede jower kame bin telo tic me woro Rubanga, kiko girgi dok timo tice me poti gi.

¹¹ Ango ako doko ger ne jotel pi kite kame gin kijalo kede ot ka Rubanga oko dong atatai. Di ango ako coko karacel Jolebi kede jower di ako dwoko gi i dog tic gi i tempulo.

¹² Di do jo me Yuda dedede bobo oko cako tero acel me tomon me engano, bwini, kede mo me olibeti i agolai me gwoko jamini i tempulo.

¹³ Ango bin ako keto jogi pi bedo jo kame gwoko jamini i agolai nogo: ngasaseredoti Selemia, Sadoki ngat kosomo iswil twatwal, kede Ngalebi Pedaya. Di ako keto Kanan wot ka Sakur, akwar Matania pi bedo ngat kame konyo gi. Jo nogi bin oudo jo ngeo gi be kigenere. Tic gin oudo en me poko jamini ne Jolebi wad gi.

¹⁴ Okwe Rubanga na, ango akwai iyutuno tice dedede abeco kame ango atieko timo pi odi kede pi jo kame wori iye.

¹⁵ I kare nono ango bin ako neno i Yuda di jo bio olok i ceng Sabato. Jo ace oudo tweo engano, bwini, olok, anyakini me epigi, kede jamini apat i ngei pundan di kiko tero gi Yerusalem; ango ako kwenyaro gi pi weko cato jamini i ceng Sabato.

¹⁶ Jo mogo da koyai ki bomba me Taya, kame bin tie bedo Yerusalem oudo kelo dek nam kede jamini ace apapat i bomba pi cato ne jo wa i ceng Sabato.

¹⁷ Ango ako doko ger ne jotel me Yuda di ako waco negi be, “Nenunu kong gikarac kame wun itienu timo! Wun itienu munao ceng Sabato.

¹⁸ Mam bin Rubanga wa okelo can nogi dedede i kom wa kede i kom bomba noni pien joakwari wa bin otimo tim acel noni? Nataman wun pwodi itienu mito medo kelo lilo ka Rubanga i kom jo Isirael pi munao ceng Sabato.”

¹⁹ Aso, ango bin ako mino cik be cako cenge nono miero kodony cego irutei me Yerusalem esawa kame ceng Sabato cakere kede di likame oko yabe tuno Sabato tiek. Ango ako keto jotic na mogo daro irutei pi neno be likame tie gimoro me acata kame okelo i bomba i ceng Sabato.

²⁰ Manono oko bin mino jocat jamini apapat oko buto ooko me Yerusalem pi iwor acel amoto are.

²¹ Do ango ako kwenyaro gi di awaco negi be, “Pinyo komio wun ibutunu ooko i nget apama iwor? Ka imedunu timo kamanono bobo ango abino suro wu.” Cako cenge nono likame gin bobo kiko medo dwogo ceng Sabato.

²² Ango ako mino cik but Jolebi pi gin lonyere di kiko bino daro irutei, tetekeny kinen be jo ogwoko ceng Sabato obedo ceng kacil. Okwe Rubanga, ango akwai iyutuno ango pi manoni, di iko gwoka pi amara ni adwong kalikame lokere.

²³ I kare nono da ango bin ako neno cuo me Iyudayan mogo kame oudo onyomo mon me Asidod, Amon, kede me Moab.

²⁴ Dul me idwe gi oudo yamo leb jo me Asidod arabo leb ateker moro apat, do oudo likame kikaruno yamo leb wa.

²⁵ Ango ako doko ger ne cuo nogo, alamo gi, abungo gi, di ako puputo yer wi gi. Di do ako mino gi kikwongere i nying Rubanga be likame bobo gin arabo idwe gi bino nyomere kede jokumbor.

²⁶ Ango ako penyere be, “Benyo, mam akodi mon nogi en kame bin omio Abaka Sulumani otimo dub? Kikom atekerin dedede, likame oudo tie abaka moro kame cal bala en. Rubanga mere oudo mare, omio eko kete pi bedo abaka me Isirael lung. Akadi kamanono da mon me obukui bin oko mine etimo dub.

²⁷ Benyo, wun imitunu be wan olub ekite wu di oko timo gikarac noni, di oko turo cik ka Rubanga wa pi nyomo mon me kumbor?”

²⁸ Yekoyada, wot ka Eliasib Ngatel me Josaseredoti, oudo tie kede wode acel konyomo nyar ka Sanabalat me Koron. Ango ako riamo wode nono tenge.

²⁹ Okwe Rubanga, ango akwai iyutuno kite kame jo nogo omunao kede tic me josaseredoti kede cikere kame in bin itimo kede josaseredoti kede Jolebi.

³⁰ Manono en kite kame ango bin ako lonyo kede jo ki jamini dedede kobedo me jo kumbor, di ako moko tice me josaseredoti kede Jolebi tetekeny dano acelacel bedo di engeo tic mere.

³¹ Ango ako iiko da kite kame kokelo kede yen me wango giayala i kare kopoore, kede kite kame jo kelo kede anyakini kame geo cek. Okwe Rubanga na, yutuno ango pi gikabeco kame ango atimo nogi.