Nakum 1 - Baibuli I Leb Kumam 2013

¹ Manoni en kop kame kowaco i kom Ninebe, kop kame mako gianyuta kame Nakum, dano me Elikosi bin oneno.

Lilo ka Rwot i kom Ninebe

² Rwot obedo Rubanga kame nganyeko, doko en etimo onyanga; Rwot timo onyanga doko en elilo. En etimo onyanga i kom jo kame dage doko en ebedo ger ne jokwor mege.

³ Rwot likame susunyo lilo do etie kede twon twer, doko en likame eweko jo kame tie kede raco abongo mino gi alola. Kakame Rwot beo iye apipiru kede yamo atek me kot cakere iye; idoun obedo apua kame tiene dunyo!

⁴ En emio nam cik, di nam ko tuo! En emio icileta tuo. Poti amio me Basan kede me moru me Kamel en emio ner, kede ature me moru me Lebanon da en emio ner.

⁵ Kabedo kame Rwot tie iye mori yangere, doko imukuran calar. Kabedo kame Rwot tie iye piny yayangun, piny kede jo dedede kame tie iye bedo kede mielkom.

⁶ Ka en elilo, ngai kame twero cungo i nyime? Ngai kame twero kanyakino gero mere? En ebwoto lilo mere bala mac, di eko bebelo kide.

⁷ Rwot ber, en etie bala apama me cel atek kame gwoko jo mege i kare me peko; En egwoko jo kame ringo gwokere bute,

⁸ akadi ki twon ariram kame dipere ringo kitek. En ebino tieko jokwor mege, ebino wapo gi paka kakacol.

⁹ Pinyo bo kamio wun itimunu iik arac i kom Rwot? En ebino muducaro wu. Likame tie dano moro kame rucakino piem kede en.

¹⁰ Gin kical bala okuto kokodo, doko kical bala joamera omer kede bwini; kobino muducaro gi atwal atwala bala arienge kotuo.

¹¹ Kibut in Ninebe, tie dano ni moro kame tie kede iik arac i kom Rwot, dano kame kelo tam me timo gikarac.

¹² Manoni en kop kame Rwot tie waco ne jo mege be, “Bed bala jo Asiria tek di kitot, kobino tieko gi di kiko doko li atwal. Jo na, bed bala ango ako mino wu inenunu can, likame bobo abino medo timo kamanono.

¹³ Ango nataman abino jiko twer me Asiria i kom wu, di ako cocoto irikoi kotweo wu nogo.”

¹⁴ Jo Asiria, manoni en gikame Rwot otieko ciko i komu: “Wun likame ibinunu bedo tie kede idwe kame bino mino nying wu meede bedo tie. Ango abino muducaro caljwogi wu kame tie i tempulo me rubangan wu. Ango abino kunyo ates wu, pien wun kony wu li.”

¹⁵ Nenunu wun jo me Yuda! Ngaor moro tie bino ki wi mori kede kop aber. En etie kelo kop me mulem! Tedunu ebaga wu di ikounu mino Rubanga gikame oudo icikerenu pi mine. Jo areco likame bobo bino suro lobo wu. Kotieko muducaro gi atwal.