Mika 4 - Baibuli I Leb Kumam 2013

Rwot bino Kelo Anapakin i Wi Lobo Lung

¹ I kare me anyim moru kame tempulo cungo i wie bino bedo moru abor malo kalamo mori dedede, ebino bedo bor malo kalamo imukuran dedede. Atekerin dedede bino sirito iye,

² jo atot bino ot iye di kiwaco be, “Ootunu i wi moru ka Rwot, i tempulo ka Rubanga me Isirael. En ebino pwonyo wa gikame en emito ne wa timo, di wan oko lubo kop mere.” Pien pwony ka Rwot bino wok ki Sion; kope mege bino wok ki Yerusalem.

³ En ebino ngolo kop i diere me atekerin, i diere me atekerin atek kame iyapiyapi kede kame tie kakabor. Gin kibino teto ipimai gi doko leb kwei me dok, kede tongini gi kibino teto doko pale me lwero yen. Atekerin likame bobo bino yi, akadi pwonyere i yi bobo.

⁴ Ngat acelacel bino bedo kede anapakin di ebedo i dud olok kede i dud yen epigi mege, di likame tie ngatamoro kame mie lworo. Manoni Rwot me jo yi en owaco.

⁵ Ateker acelacel lubo rubanga mere, do wan obino lubo Rwot Rubanga wa nakanaka.

Jo Isirael bino Dwogo ki Obukui

⁶ Rwot waco be, “I kare nono ango abino coko karacel ingwalasa, kede jo koudo ango amio oneno can ki obukui.

⁷ Ingwalasa bino bedo donge me jo na, kede jo kame koudo koriamo tenge, bino doko ateker atek. Di ango Rwot en kame ako bino bedo pugo gi i moru me Sion nakanaka.”

⁸ Aso in, Yerusalem, kabedo kame Rubanga, bala ngakwat, neno kiye jo mege, ibino bobo bedo bomba adwong kame abaka ni pugo kiye bala bin sek.

⁹ Yerusalem, pinyo kara komio in itie boroboro koko? Pinyo komio in itie winyo lito bala dako kame tie ramere me nywal? Benyo, mam nat in itie kamanono pien in ili kede abaka, doko jo kame mii tam otieko to?

¹⁰ Wun jo me Yerusalem, kwekwetanu di icurunu bala dako kame tie ramere me nywal, pien nataman wun miero iwekunu bomba di ikounu ot bedo obar i kimere. Wun ibinunu ot Babilon, do Rwot bino lako wu ki cing jokwor wu ki kunono.

¹¹ Aso, nataman atekerin atot otieko cokere pi suri. Gin kiwaco be, “Miero komunao Yerusalem! Wan obino nene kede wang wa di kotieko dudubo en.”

¹² Do atekerin nogi likame ngeo tam ka Rwot. Gin likame kingeo be en ecoko gi karacel bala engano kame kocoko pi canyo, pi mino gi alola.

¹³ Rwot waco be, “Wun jo me Yerusalem, yaunu di ikounu ot canyo atekerin nogo! Ango abino mino wu ibedunu tek bala twon kame tunge tie lilim, doko abelekek mege obedo me nyonyo buronsi. Ibinunu nyinyito atekerin atot, di abar kame gin kitie kede, kame oudo kiudo i yore me gero, wun ikounu bino kelo buta, ango Rwot me wi lobo lung.”