Mika 3 - Baibuli I Leb Kumam 2013

Mika Oronkino Jotel me Isirael

¹ Winyunu, wun jotel me Isirael! Wun en kame tic wu obedo ngeno poko gikame opoore me atima, kede kalikame opoore me atima,

² aso di wun idagunu gikaber di ikounu maro gikarac. Wun iyangunu jo na bala leini, di ikounu koco ringo ki cogere gi.

³ Wun icamunu ringokom jo na. Ipacunu delkom gi, ituturunu cogere gi, di ikounu totongo gi bala ringo me ateda.

⁴ Kare tie bino kame wun jotel, ibinunu kok but Rwot pi konyo wu, do en likame ebino gamo dog wu. I kare nono en ebino kano wange kibut wu, pien udo wun itiekunu timo gikarac.

⁵ Rwot waco kaman i kom inabin me angalo: “Wun inabin me angalo itienu rwenyo jo na! Wun iwacunu be mulem bino bedo tie ka komio wu gimoro me acama, do but jo kalikame mio wu gimoro, wun iwacunu be yi bino bedo tie.

⁶ Wun kare wu otiek; piny tie do yuto ne wu. Pien wun irwenyunu jo na, likame bobo ibinunu udo gianyuta moro kibuta, doko likame ibinunu tuco kop moro me anyim.”

⁷ Jo amurao kede jo kame lamuso kobino mino lewic mako gi. Gin kibino umo dog gi, pien Rubanga likame gamo dog gi.

⁸ Do Rwot otieko pongo twer kede tipo mere i kuo na. En emia nwangcuny me yamo i kom ngolo kop me ateni, kede tuco ne jo Isirael dub gi.

⁹ Winyunu kop noni, wun jopug me Isirael, wun jo kame idagunu ngolo kop me ateni, doko idwadwanyunu kop kame tie kakaler.

¹⁰ Wun itienu gero Yerusalem, bomba ka Rubanga, kede sente me remo me jo, kede kame iudunu i yore karac.

¹¹ Jotel me bomba ngolo kop pi cemusana, josaseredoti mio koculo gi pi pwonyo jo Iswil, inabino likame murao kwanyo di koculo gi. Aso di gin dedede kigengere but Rwot di kiwaco be, “Ateteni Rwot tie kede wa, likame tie gimoro arac kame bino timere ne wa.”

¹² Aso, pi wun, kobino puro Sion bala poto, Yerusalem bino doko atukit me ameje, di wi moru kame nataman tempulo cungo iye ko bino doko abum.