Mika 2 - Baibuli I Leb Kumam 2013

Gikame bino Timere ne Jo kame Tero Jocan Kirac

¹ Jo kame buto di kineeno iwor kiakia pi iiko tam me timo gikarac tin tie i can benyo! Ka piny oru, gin di do kiko timo gikarac kame oudo kiiko nono, pien twer tie i cing gi.

² Ka gin kingobelo poti, kimao gi ki cing wegi; ka kingobelo ude, kitero gi. Gin kitero won ot kirac di kiko mano ode kitero, doko kitero jo kirac di kiko mano gi iner me lobo kame kilunyo kibut joakwari gi.

³ Manono en komio Rwot tie waco be, “Nenunu, ango nataman atie iikere pi kelo can i komu, can kalikame ibinunu bwot kiye; likame bobo ibinunu ot kede ewaka, pien kare nono bino bedo kare me peko.”

⁴ I kare nono jo bino wero wer me agecan i komu. Gin kibino wer kaman: “Wan do otiek girwa! Rwot otieko tero lobo wa, en ekwanye kibut wa, di eko popoko en ne jo komako wa bala mabus.”

⁵ Pi mano, kame kare otuno me dwoko ne jo ka Rwot lobo, likame tie ngatamoro kikom ikwae wu kame bino udo iner moro.

⁶ Jo rabo na kop di kiwaco be, “Kur irabo ne wan kop kame cal kamago. Rubanga likame bino mino wan lewic.

⁷ Benyo, wun iparunu be kolamo jo Isirael? Benyo, iparunu be Rwot likame romo dire? Benyo, magonogi obedo tice mege? Mam wun iparunu be en likame eromo yamo kede mwolo but jo kame timo gi kopoore?”

⁸ Rwot gamo be, “Wun isurunu jo na bala jokwor; igonyunu igoen ki kom jo kame li kede gero moro, ki kom jo kame tie beo abea di kigeno be likame tie gimoro arac kame bino timere negi, doko di likame kitie kede tam moro me yi da.

⁹ Wun ibedunu riamo tenge mon me jo na ki miere gi kame yomo cuny gi, doko igengunu idwe gi udo winyo na atwal.

¹⁰ Yai iotunu, pien kan likame obedo kabedo me wei. Wun itiekunu pwoke kede dub wu di ikounu dudubo en atwal.

¹¹ “Wun cunyu mito enabi kame bino di eko donyo waco ne wu kope me angalo be, ‘Ango amurao ne wu be, bwini kede kongo akec bino mol ne wu bala pii.’

¹² “Ango ateteni abino coko wun jo ka Yakobo, wun jo dedede me Isirael kodong. Ango abino coko wu karacel bala romini kame tie i anok. Lobo wu bobo bino pong kede jo bala romini kame tie cam i ebar.”

¹³ Rubanga bino yabo negi yongayo di eko telo gi yai ki lobo me obukui. Gin kibino turo erute me bomba di kiko yai ot. Abaka gin, Rwot kikome, bino telo gi.