Matayo 27 - Baibuli I Leb Kumam 2013

Kotero Yesu i nyim Pilato

¹ Kakame piny oru kede, jodongo me josaseredoti dedede karacel kede joadongo me piny oko cokere pi moko tam me neko Yesu.

² Gin kiko twene di kiko tere kikete i cing Pilato ngapug.

To ka Yuda

³ Kakame Yuda, ngat kame orupao Yesu, bin oneno kede be kotieko ngolo ne Yesu kop me to, en eko swilaro, di eko dwoko siringi akaya ot adek nogo but jodongo me josaseredoti kede joadongo me piny,

⁴ di ewaco be, “Ango adubo pi rupao dano kame li kede kop, pi mine onyo remo mere.” Gin kiko dwoko be, “Mano likame mako wan; mano makin.”

⁵ Yuda oko kiro sente piny i tempulo di eko yai eoto tenge di eko dere.

⁶ Jodongo me josaseredoti oko depo sente ka di kiwaco be, “Iswil likame yei ne wa keto magi i isau kame okano iye sente me tempulo, pien gin kibedo sente kame koonyo kede remo.”

⁷ Kikano gin kiko poro kop karacel di kiko wilo poto me ngacwei agune kede sente nogo, pi bedo kakame koyiko iye jokumbor.

⁸ Gino en komio kolwongo poto nono be Poto me Remo tuno tin.

⁹ Di do gikame bin enabi Yeremia owaco oko cobere kakare, kame yamo be, “Kiko kwanyo siringi ot adek akaya, en wel kame jo mogo me Isirael oudo oyei culo i kome.

¹⁰ Kiko wilo poto me ngacwei agune kede sente nogo, bala kame Rwot onyuto na.”

Pilato Opepenyo Yesu

¹¹ Yesu oko cungo i nyim ngapug me Roma, kame oko penye be, “In ibedo abaka me Iyudayan?” Yesu oko dwoko be, “In en iwaco kamanono.”

¹² Do kakame jodongo me josaseredoti kede joadongo me piny opide kede, en likame eko dwoko kop moro.

¹³ Di do Pilato oko penye be, “Mam itie winyo kope atot kame kitie pidi iye?”

¹⁴ Do Yesu likame oko dwoko ne kop moro akadi acel i kom gi dedede kame kopide iye. Ngapug oko uro adikinicel.

Kongolo ne Yesu Kop me To

¹⁵ Bin i kare dedede me Ebaga me Kalamo, ngapug me Roma oudo onare gonyo ne jo mabus acel kame gin kimito be gony ne gi.

¹⁶ I kare nono oudo tie mabus acel kame wie rac, kame nyinge Baraba.

¹⁷ Kakame jo oudo otieko cokere kede karacel, Pilato oko penyo gi be, “Imitunu be agony ne wu ngai? Baraba arabo Yesu kame kolwongo be Kirisito?”

¹⁸ Pien oudo en engeo be jotel me Iyudayan kede joadongo me piny bin omio Yesu i cinge pi nyeko gi.

¹⁹ Kakame Pilato oudo tie bedo kede i kom me ngolo kop, dako mere oko cwano ne kop be, “Kur itim gimoro i kom dano no, en eli kede kop moro, pien oki iwor ango oudo abedo i peko adikinicel pi lek kame abedo tie kede i kome.”

²⁰ Jodongo me josaseredoti kede joadongo me piny oko supo jo pi penyo be gony ne gi Baraba, di oko neko Yesu.

²¹ Ngapug bobo oko penyo gi be, “Ngai kikom jo are gi en kame wun imitunu be ango agony ne wu?” Gin kiko dwoko be, “Baraba.”

²² Pilato oko penyo gi be, “Nyo do kame poore atim ne Yesu kame kolwongo be Kirisito?” Gin dedede kiko dwoko be, “Wek gure i kom musalaba.”

²³ Do Pilato oko penyo gi be, “Pinyo, oudo etimo nyo arac?” Do gin kiko medo lelemo kitek be, “Wek gure i kom musalaba.”

²⁴ Kakame Pilato oneno kede be likame ekaruno bobo timo gimoro, doko jo tie mito cako doko ger, en eko kwanyo pii di eko lwoko kede cinge i nyim ekodet me jo di ewaco be, “Ango gira ali kede raco moro i kom onyo remo me dano ni! Kop no mako wun.”

²⁵ Jo dedede oko dwoko be, “Wek remo mere bed i wi wan kede i wi idwe wa.”

²⁶ Pilato di oko gonyo ne gi Baraba, en eko mino kodao Yesu di eko mine i cing gi pi ot gure i kom musalaba.

Isirikalen Otimo ne Yesu Tim me Anywar

²⁷ Kikano, isirikalen me ngapug oko tero Yesu i ot me ngapug gi, di kiko coko isirikalen apat dedede me kuno i nyime.

²⁸ Kiko gonyo igoen mege di kiko ngapo ne ekanso akwakwar.

²⁹ Kiko cweno okuto aluka di kiko rwako ne i wie, di kiko keto magada i cinge tetu cam, kiko donyo riondiko piny i nyime pi nyware di kiwaco be, “Yoga, abaka me Iyudayan!”

³⁰ Kiko ngungulo lau i kome, di do kiko kwanyo magada kiko jwato kede wie.

³¹ Kakame kitieko do timo ne kede tim me anywar, kiko gonyo ekanso nono di kiko ngapo ne igoen mege, di do kiko tere tenge pi ot gure i kom musalaba.

Koguro Yesu i kom Musalaba

³² Kakame oudo kitie wok kede ki bomba, kiko ngoole i kom icuo moro me Sirene, kame nyinge Simoni, di kiko dine tetek yeno musalaba ka Yesu.

³³ I kare kame kituno kede kakame kolwongo be Gologota (kame dwong mere be, kabedo me cogowic),

³⁴ gin kiko mino Yesu bwini kame konyalo kede gi akec; do kakame ebilo kede, likame en eko mato.

³⁵ Di do kitieko gure, kiko uco alulu pi udo epone me pokopoko igoen mege.

³⁶ Di do gin kiko donyo bedo kuno pi dare.

³⁷ I wie malo oudo koketo iye iwandik me kop kame pide, kame somere be, “Man en Yesu, Abaka me Iyudayan.”

³⁸ Kiko guro joyak are da karacel kede Yesu, acel i bade tetu cam kede ocelu i bade tetu ngodal.

³⁹ Jo kame oudo beo kuno oudo yayango wi gi di kiwaco ne kop me anywar be,

⁴⁰ “In ngat kame oudo iyaro turo tempulo di iko gere pi ceng adek, lakere keni! Ka in Wot ka Rubanga, wok piny ki musalaba.”

⁴¹ Kamanono da jodongo me josaseredoti, jopwony me Iswil karacel kede joadongo me piny oko donyo nyware di kiwaco be,

⁴² “En elako jo apat, do likame etwero lakere kene. En abaka me Isirael, wek en nan ewok piny ki musalaba, di wan oko bino yei en.

⁴³ En oudo eketo gen mere i kom Rubanga, wek Rubanga nan lake, ka cunye mito. Piento en oudo ewaco be, ‘Ango Wot ka Rubanga.’ ”

⁴⁴ Joyak are kame oudo kogure kede da oko donyo yeyeto en iepone acel nono.

To ka Yesu

⁴⁵ Cako esawa kanyape me iceng, piny lung oko doko col paka tuno esawa kanyangon me otieno.

⁴⁶ Tetu esawa kanyangon, Yesu oko kok kede dwane amalo be, “Eli, Eli lama sabaktani?” Kame dwong mere be, “Rubanga na, Rubanga na, pinyo komio ijala?”

⁴⁷ Jo kame oudo tie cungo kuno owinyo di kiko waco be, “Icuo ni tie lwongo Elia.”

⁴⁸ Ngat acel kikom gi oko ringo ot kwanyo ecango, en eko keto iye bwini awac, di eko rwako i wi magada eko mino Yesu be ejwijwio.

⁴⁹ Do jo apat oko waco be, “Odarunu ber, omito neno ka Elia oyaro bino lake.”

⁵⁰ Yesu bobo oko kok kede dwan amalo di do eko omo cunye di eko to.

⁵¹ Kikano, egoe kame bin poko isenge me tempulo oko yec cako ki malo tuno piny, piny oko yangere, di lela oko belubelun.

⁵² Atesin da oko yabere, di oko yaruno jokacil atot kame bin oto.

⁵³ Kakame kiwok kede ki atesin ingei Yesu yaruno, kiko ot i bomba kacil di kiko nyutere but jo katot.

⁵⁴ Bin di ngadwong me isirikalen kede jo apat kame oudo tie karacel kede en pi daro Yesu oneno yangere me piny kede gikame otimere, lworo oko mako gi di kiko waco be, “Ateteni dano ni oudo Wot ka Rubanga.”

⁵⁵ Mon atot da oudo tie kuno, mon kame bin lubo Yesu i Galilaya di kikonye. Gin oudo kitie neno gikame oudo tie timere i kakabobor.

⁵⁶ Kikom gi oudo tie iye Maria Magadalina, Maria toto me Yakobo kede Yosepu, kede dako ka Sebedayo.

Koyiko Yesu

⁵⁷ Di piny oyuto, icuo kobaro me Arimatea, kame nyinge Yosepu oko ot kuno. Eda oudo bin ebedo ngasiao ka Yesu.

⁵⁸ En bin eoto but Pilato di eko penye kom Yesu; Pilato oko waco be mie.

⁵⁹ Yosepu oko kwanyo kom Yesu eko bono kede esuka acil;

⁶⁰ di eko kete i ates mere kame oudo pwodi eroko nyen i lela, eko loro kidi ati i dog ates di en eko ot tenge.

⁶¹ Maria Magadalina kede Maria ocelu oudo tie bedo kuno i nyim ates.

Koketo Jo pi Daro Ates

⁶² Oru mere, di do ceng me iikere oudo otiek, jodongo me josaseredoti karacel kede Iparisayon oko ot cokere karacel i nyim Pilato

⁶³ kiko waco ne be, “Adwong, wan oyutuno be di pwodi ngaangalo no kuo, oudo ewaco be, ‘Ingei ceng adek abino yaruno bobo.’

⁶⁴ Pi mano, mi cik me wek dar ates tuno kede di ceng me adek okato, tetekeny kur josiao mege kwal kome di kiko waco ne jo be, ‘En etieko yaruno kikom jo oto,’ kop me angalo noni bino bedo rac kalamo me agege ca.”

⁶⁵ Pilato oko waco ne gi be, “Terunu isirikalen iotunu idarunu kuno kiber bala kame itwerunu.”

⁶⁶ Gin kiko ot di kiko mwono engaro me dog ates kiber, di kiko keto jodar pi neno be kodaro ates kiber.