Matayo 24 - Baibuli I Leb Kumam 2013

Yesu Owaco Kop me Reto Tempulo

¹ Kakame Yesu oyai kede ki tempulo di do oudo etie ot, josiao mege oko bino pi nyuto ne gedo me tempulo.

² Do en eko dwoko ne gi be, “Mam inenunu gigi dedede? Ateteni awaco ne wu be, likame tie engaro moro kame bino dong cungo i wi kidi ocelu; kobino rereto gin dedede piny.”

Peko kede Itidil

³ Kakame Yesu oudo tie bedo kede i wi moru me Olibeti, josiao oko lwidar ot bute, di kiko penye be, “Wac ne wa, awene en kame gini bino timere kede, doko da gianena nyo kame bino nyuto dwogo nin, kede ajikini me piny?”

⁴ Yesu oko dwoko ne gi be, “Gwokerenu me wek kur ngatamoro rweny wu.

⁵ Pien jo atot oyaro bino i nyinga di kiwaco be, ‘Ango en Kirisito,’ di gin kiko bino rwenyo jo atot.

⁶ Doko ibinunu winyo kop me yi kede rwonge me yi, do nenunu be likame imiunu cunyu opoto; pien manono miero timere di ajikini pwodi likame otuno.

⁷ Atekerin bino yi, ajakanut acel bino yi kede ajakanut ocelu, doko kec kede yangere me piny bino bedo tie kabedere atot.

⁸ Magi dedede tie bala agege me aramo me nywal.

⁹ “Gin kiko bino mino wu i cing jo kame bino tidilo wu, kiko bino neko wu da. Piny lung bino dagi wu pira.

¹⁰ Jo atot bino poto ki yei gi, doko kiko donyo timo erupe di kidagere ken gi ken gi.

¹¹ Doko inabin me angalo bino neeno, di kiko rwenyo jo atot.

¹² Pi kite kame tim areco udo onyai kede, amara me jo atot bino dok piny.

¹³ Do ngat kame bino kanyakino tuno i ajikini bino udo alako.

¹⁴ Koyaro bino tuco ejiri noni me Ajakanut ka Rubanga i piny lung, bala gi me ijura ne atekerin dedede; di do ajikini me piny ko bino tuno.

Gikame Kelo Lworo Adwong

¹⁵ “Aso, kame inenunu gikame munao kabedo kacil ka Rubanga, kame bin enabi Danieri owaco kop i kome, di etie cungo i kabedo kacil (ngat kame tie somo poore niang dwong mere)

¹⁶ jo kame tie Yudea miero do ringi i wi mori;

¹⁷ kede ngat kame tie i wi ot miero kur bobo wok piny pi kwanyo gikame tie i yi ot.

¹⁸ Doko dano kame tie i poto miero kur dok i paco pi omo egoe.

¹⁹ Can tin bino bedo dwong benyo ne mon oyac kede kame doto idwe i ceng nogo!

²⁰ Kwaunu Rubanga me wek kur ringo timere ne wu i kare me ngico arabo i Ceng Sabato.

²¹ I kare no can adwong bino bedo tie, kame epone mere likame pwodi lem otimere geno piny cakere tuno tin, doko da likame ebino medo timere.

²² Doko koto Rubanga likame odwoko wel me ceng nogo odoko nonok, koto likame ngatamoro obwot; do pi jo mege kame en eyero, Rubanga bino dwodwoko ceng nogo doko nonok.

²³ “Pi mano, ka ngatamoro owaco ne wu be, ‘Neni, Kirisito ine!’ Arabo be, ‘En ica!’ Kur iyeunu kop mere.

²⁴ Pien jo kame cuko be gin Kirisito, kede inabin me angalo oyaro bino di kiko timo gianena kede gi me isuur, tetekeny ka twerere, kirweny kiton jo kame Rubanga oyero da.

²⁵ Winyunu, ango atieko waco ne wu gigi di kare pwodi likame otuno.

²⁶ “Aso, ka ngatamoro owaco ne wu be, ‘Nenunu, en etie i wi tim,’ kur iotunu kuno. Arabo be, ‘Nenunu, en etie i agola,’ kur iyeunu kop mere.

²⁷ Pien bino me Wot ka dano bino bedo cal bala kot kame meny cako ki tetu kide tuno tetu potoceng.

²⁸ Kakame gi oto tie iye, kunono en kame acut da cokere iye.

Dwogo ka Wot ka Dano

²⁹ “Cucuto di can me ceng nogo otieko timere, wang ceng bino doko col, duwe likame doko bino rieny, acerin da bino popoto ki malo, kede twer kame tie i malo bino yayangun.

³⁰ Di gikame nyuto bino me Wot ka dano ko bino neeno i malo; atekerin dedede me wi lobo ko bino bedo kede iturur, di do kiko neno Wot ka dano di tie bino kede idoun me malo kede twer kede twon deyo.

³¹ Di en eko bino cwano imalaikan mege kede koko atek me agwara, di gin kiko coko jo mege kame eyero ki tetu bad ongwon dedede, cako ki agege me piny tuno i ajikini mere.

Pwony kame Yai ki kom Yat Epigi

³² “Siaonu pwony kame yai ki kom yat epigi. Cucuto kame ajange mege odoko yoyom di pote gi oko cako lot, wun ingeunu be kare me iporo do oyapuno.

³³ Iepone nono da kame inenunu gigi dedede tie timere, ngeunu be en etieko doko iyapiyapi, kom etuno i erute.

³⁴ Ateteni ango awaco ne wu be, gigi dedede bino timere di pwodi jo kame nan tie di kuo likame oto.

³⁵ Malo kede lobo bino rwenyo, do kope nango likame bino rwenyo.

Likame tie Ngat kame Ngeo Ceng amoto Esawa nono

³⁶ “Do likame tie ngat kame ngeo awene kame ceng amotoko esawa nono bino tuno kede. Akadi imalaikan me i malo da likame ngeo, akadi Wot ka Rubanga da likame ngeo, do Papa kenekene en kame ngeo.

³⁷ Bino me Wot ka dano bino bedo bala gikame bin otimere i kare ka Nua.

³⁸ Pien i kare nono, di pwodi alele likame oumo piny, jo oudo tie cam kede amata di kinyomere, doko di kimio anyira gi me anyoma, paka tuno i ceng kame Nua odonyo kede i yi yee;

³⁹ doko oudo gin likame kingeo gikame tie timere tuno kede alele oko bino di oko neko gi. Bino me Wot ka dano da bino bedo kamanono.

⁴⁰ Cenge no, ka jo are tie pur i poto, kobino kwanyo dano acel oko tero di oweko ngat ocelu.

⁴¹ Kobino tero dako acel ki kom mon are kame tie riego karacel di oweko ngat acel dong.

⁴² “Pi mano, gwokerenu, pien likame ingeunu ceng kame Rwot wu oyaro bino kede.

⁴³ Do ngeunu kiber be, koto di oudo won ot ngeo esawa me iwor kame ngakuwo tie bino iye, oudo koto egwokere di likame eko weko koturo ode.

⁴⁴ Pi mano, wuda bedunu di itiekunu iikere, pien Wot ka dano bino ngoole dwogo iesawa kame wun likame ingeunu.

Ngatic kame Genere amoto kalikame Genere

⁴⁵ “Ngai do en ngatic kame genere di eriek, kame ngadwong mere kete daro ode kede jame dedede kame tie iye, pi mino jotic icegun cam iesawa kopoore?

⁴⁶ Etie kede winyo ngatic nono ka ngadwong mere bino dwogo ko ude di etie timo kamanono.

⁴⁷ Ateteni awaco ne wu be, en ebino keto ngatic nono pi lono jame mege dedede.

⁴⁸ Do ka en ebedo ngatic arac, en ebino waco kene be, ‘Ngadwong na ogal,’

⁴⁹ di do en eko gire cako bungo jotic wad gi, di eko donyo cam di emato karacel kede joamera.

⁵⁰ Ngadwong me ngatic nono bino ngoole dwogo i ceng kalikame en egeno be eromo dwogo iye kede iesawa kame en ekwia,

⁵¹ di eko bino mine alola atek, di eko kete karacel kede joecuke, kakame koko kede mwodo lak bino bedo tie iye.