Matayo 19 - Baibuli I Leb Kumam 2013

Yesu Opwonyo kop kame mako Gonyo Nyom

¹ Kakame Yesu otieko waco kede kope nogi, en eko yai ki Galilaya i adul me Yudea, kame tie loka tetuca me ecilet me Yorodan.

² Ikodeta adongodongo me jo oko lube di en eko cango jotuwo ki kuno.

³ Iparisayon mogo oko bino bute pi kino doge di ki penye be, “Iswil wa yei ne dano riamo dako mere pi tien kop moroni kenekene?”

⁴ Yesu oko dwoko ne gi be, “Mam itiekunu somo iwandik kacil kame waco be, ngat kame bin ocweo jo i kare me agege ocweo gi icuo kede dako,

⁵ di en eko waco be, ‘Pi manoni, icuo bino weko papa mere kede toto mere, di en eko ribere kede dako mere, gin jo are go kiko doko kom acel’?

⁶ Aso, udo doko likame kitie jo are, do udo gin kidoko kom acel. Pi mano, gikame Rubanga otieko ribo karacel, kur ngatamoro poki.”

⁷ Iparisayon oko penye be, “Do pinyo komio Musa bin oko mino cik kame waco be, dano karuno mino cege baluwa me gonyo nyom di en eko riame?”

⁸ Yesu oko dwoko ne gi be, “Musa bin oyei ne wu pokere kede mon wu pi tek wi wu. Do oudo likame etie kamanono cako ki agege me cweno piny.

⁹ Pi mano, ango awaco ne wu be, tek ngat kame riamo dako mere pi kop ace apat kede kop me caro, di en eko nyomo dako ace, udo etimo adote.”

¹⁰ Josiao oko waco ne be, “Ka mano en gikame tie i dier icuo kede dako mere, tikatika jo oudo wek do nyomere.”

¹¹ Do Yesu oko dwoko ne gi be, “Likame jo dedede bino yei gamo kop noni, do kenekene jo kame Rubanga omio kop noni but gi.

¹² Pien tie jo kame konywalo di gin kibedo abwocin, kede tie da jo mogo kame jo en komio gi kibedo abwocin, kede tie jo komito bedo abwocin ken gi pi Ajakanut me malo. Ngat kame twero yei gamo kop noni wek egami.”

Yesu Omio Idwe atino Winyo

¹³ Jo mogo oko kelo idwe atino but Yesu me wek eket cinge i wi gi di eko lego ne gi. Do josiao oko donyo cokocoko gi be kiweki.

¹⁴ Do Yesu oko waco be, “Wekunu idwe atino bin buta, kur igengunu gi; pien Ajakanut me malo tie pi jo kame cal bala gin.”

¹⁵ En eko keto cinge i wi gi di eko yai eoto tenge.

Awobi Kobaro

¹⁶ Kikano awobi moro kame oudo obaro oko bino but Yesu di oko penye be, “Apwony, nyo aber kame poore na timo pi udo kuo kame bedo nakanaka?”

¹⁷ Yesu oko penye be, “Pinyo bo komio ipenya i kom kop kame mako gikaber? Ngat acel kenekene en kame ber. Ka imito donyo i kuo kame bedo nakanaka, poore igwok cik ka Rubanga.”

¹⁸ En eko penyo Yesu be, “Cik mege?” Yesu oko dwoko ne be, “Kur ineko; Kur itimo adote; Kur ikwalo; Kur imio ijura me angalo;

¹⁹ Wor papa ni kede toto ni; Imar ngakio ni bala kite kame imaro kede komi keni.”

²⁰ Awobi nono oko dwoko ne be, “Ango atieko gwoko cik go dedede; nyo kame pwodi arem kede?”

²¹ Yesu oko waco ne be, “Ka imito bedo ngat kame ber, ot iko cato jame kame itie kede, di iko mino jocan sente kame iudo di iko bino bedo kede abar i malo, di do iko bino luba.”

²² Kakame awobi nono owinyo kede kop no, en eko ot tenge di cunye owang, pien oudo ebaro twatwal.

²³ Yesu oko waco ne josiao mege be, “Ateteni awaco ne wu be, ebino bedo tek twatwal ne ngabar donyo i Ajakanut me malo.

²⁴ Doko awaco ne wu be, eyoyot ne aguragura donyo ki wang piso kalamo ngabar donyo i Ajakanut ka Rubanga.”

²⁵ Kakame josiao owinyo kede kop noni, gin kiko bedo kede lworo adwong di kipenyere be, “Ngai do kame twero udo alako?”

²⁶ Do Yesu oko ngino gi di eko waco be, “Man likame twerere kibut dano, do kibut Rubanga gi dedede twerere.”

²⁷ Di Petero oko dwoko be, “Neningo, wan oweko gi dedede di oko lubi. Nyo kame wan obino do udo?”

²⁸ Yesu oko waco ne gi be, “Ateteni awaco ne wu be, i kare kame Wot ka dano bino bedo kede i kom mere me deyo i piny kanyen, wun jo kame ibedunu luba i ibinunu bedo i kabedo me pug tomon kiwie are pi pugo atekerin tomon kiwie are me Isirael.

²⁹ Doko ngat acelacel kame oweko ude mege, imiegu arabo amiegu mege, papa mere arabo toto mere, idwe mege arabo lobo mere pira, ebino udo gikame kalamo magonogi tien tol acel, doko en eko bino udo kuo kame bedo nakanaka.

³⁰ Do jo atot kame nataman tie me agege bino bedo me ajikini, kede jo kame nataman tie me ajikini bino bedo me agege.