Matayo 13 - Baibuli I Leb Kumam 2013

Agole me Ngacuc

¹ Cenge nono Yesu oko yai ki ot di eko ot bedo piny i dog nam.

² Ikodeta adongo me jo oko cokere bute, omio en eko donyo i yi yee di eko bedo iye; jo dedede oko dong cungo i dog nam.

³ En eko waco ne gi kope atot i agole. En ewaco be, “Bin tie dano moro kame ooto i poto cuno kodi.

⁴ Kakame oudo etie cuc kede, kodi mogo oko popoto i yongayo, winy oko bino di oko camo gi pit.

⁵ Kodi mogo oko popoto i lobo kobedo lela lela, kakame lobo oudo rerep kiye, kiko susunyo tui pien lobo oudo nonok.

⁶ Do kakame ceng orieny kede, ceng oko wango gi kiko ner, pien aliasin gi oudo likame odonyo piny kiber.

⁷ Kodi mogo oko popoto kakame okuto oudo tie iye, mago okuto oko susunyo dongo di oko twilo gi.

⁸ Apat oko popoto i lobo aber kiko nyak, mogo olingo wi gi kame wit gi tie kede nyige tol acel, mogo ot kanyape, kede mogo ot adek.

⁹ “Ngat kame tie kede yite wek ewinyi.”

Gikame omio Yesu Pwonyo i Agole

¹⁰ Kikano josiao oko bino but Yesu di kiko penye be, “Pinyo komio in iyamo kede gi i agole?”

¹¹ En eko dwoko be, “Pien kotieko mino wun ngeno mung me Ajakanut me malo, do Rubanga likame omio jo apat ngec nono.

¹² Pien ngat kame tie kede gimoro kobino medo ne ace, tetekeny en eko bedo kede atot; do ngat kame li kede gimoro, akadi atitidi kame etie kede da kobino kwanyo kibute.

¹³ Ango ayamo kede gi i agole pien gin kingio do likame kineno, kiciko yit gi do likame kitwero winyo amoto niang.

¹⁴ Gikame bin Isaya omurao ocobere kakare kibut gi, kame waco be, “‘Ateteni jogi bino winyo kop do likame kiko niang, kede kibino ngino do likame kiko neno.

¹⁵ Pien wi gi odoko pek, kede kiculo yit gi da kur winy kop, doko kimio wang gi da; ka koto oudo likame kamanono, koto wang gi okaruno neno, doko yit gi koto owinyo, kede koto wi gi da oniang, di kiko lokere buta di ango ako cango gi.’

¹⁶ “Do wun itienu kede winyo pien wangun neno, doko yitu winyo.

¹⁷ Ateteni ango awaco ne wu be, bin inabin kede jo kopoore atot oudo tie kede mit me neno gikame wun inenunu, do likame kiko neno, doko oudo kimito winyo gikame wun iwinyunu, do likame kiko winyo.

Yesu Ogonyo dwong me Agole me Ngacuc

¹⁸ “Pi mano, winyunu gikame agole me ngacuc pwonyo.

¹⁹ Ka ngatamoro owinyo kop me Ajakanut ka Rubanga di likame en eko keto i kuo mere, Ngarac bino di eko waraso kop kame kocuo i cunye. Ngat nono cal bala kodi kopopoto i yongayo.

²⁰ Kodi kopopoto i lobo kobedo lela lela cungo pi dano kame winyo kop ka Rubanga, cucuto en eko game kede kilel;

²¹ do kop nono likame ko keto aliasin i kuo mere, mio en eko kanyakino pi kare acecek. Aso, ka peko arabo itidil moro oko bino pi kop nono, en epoto cucuto.

²² Kodi kopopoto i dier okuto cungo pi dano kame winyo kop ka Rubanga, do pi paro kuo me piny kan kede mito abar ko twilo kop nono di ko mine likame enyako anyakini me yei i kuo mere.

²³ Kodi kopopoto i lobo aber cungo pi dano kame winyo kop ka Rubanga di eko mino edonyo i kuo mere, en eko timo anyakini me yei bala kodi kame wie nyako nyige tol acel i wite acel, ace ot kanyape kede apat ot adek.”

Agole me Doi

²⁴ Yesu oko bobo waco ne jo agole ace be, “Kokaruno poro Ajakanut me malo kede ngat kocuo kodi abeco i poto mere.

²⁵ Do iwor acel di oudo jo dedede tie nino, ngakwor mere oko ot di eko cuno nyige me okitu i poto me kal nono, eko gire ot tenge.

²⁶ I kare kame kal odongo kede di kiko suro, okitu da oko neeno.

²⁷ Jotic me won paco nono oko ot bute kiko waco ne be, ‘Adwong, mam bin in oudo icuo kodi abeco i poto nin? Doko okitu otuno iye benyo?’

²⁸ En eko dwoko ne gi be, ‘Miero di ngakwor na moro en kotimo gino.’ Jotic oko penye be, ‘Do nan imito be wan ooti opuputo gi?’

²⁹ Di en eko waco be, ‘Li, pien kame ipuputunu okitu, ibinunu puputo kiton kal da karacel kede gi.

³⁰ Wekunu gin kimeede dongo karacel tuno i kare me kac, di ango ako bino waco ne jokac pi ber cako puputo okitu, di kiko twetweo gi i abungeta pi wango gi, i cen mere gin kiko bino coko kal kiko keto i dero na.’ ”

Agole me Nyige me Karadali

³¹ Yesu bobo oko waco ne gi agole ace be, “Ajakanut me malo cal bala nyige me karadali kame dano kwanyo di en eko cuno i poto mere.

³² En etitidi kalamo kodere dedede, do kame etui eko dongo, edoko dwong kalamo deke dedede kame jo pito i poti, di en eko doko yat ojanyo, kame mio winy bino ko gero ude gi i ajange mege.”

Agole me Arup

³³ Yesu bobo oko tatamo ne gi agole ace be, “Ajakanut me malo cal bala arup kame dako kwanyo di eko nyalo kede alos aromo gipim adek, tuno kede di en eko mino moko alos lung buuno.”

Pwony i Agole

³⁴ Magi dedede bin Yesu owaco ne ekodet i agole, ateteni mere likame tie gimoro kame en epwonyo gi abongo tic kede agole.

³⁵ En etimo kaman pi mino cobere kakare gikame enabi bin owaco be, “Abino yamo kede gi i agole; abino tuco gi komungere cako i kare kame kocweo kede piny.”

Yesu Ogonyo dwong me Agole me Doi

³⁶ Yesu oko yai eweko ekodet me jo, en eko ot di eko donyo i ot, josiao mege oko bino bute di kiwaco be, “Gony ne wa dwong me agole me doi kame tie i poto.”

³⁷ En eko dwoko be, “Ngat kame ocuo kodi abeco en Wot ka dano;

³⁸ poto en piny, kodi abeco en jo kame tie i Ajakanut ka Rubanga, doi en jo ka Ngarac.

³⁹ Ngakwor kame ocuo doi en Sitani, kac en ajikini me piny, kede jokac en imalaikan.

⁴⁰ Bala kite kame kocoko kede doi di oko wango i mac, ebino timere kamanono da i ajikini me piny.

⁴¹ Wot ka dano bino oro imalaikan mege, gin kiko bino coko jo dedede kame tao ne jo apat dubo, kede jo kame timo gikareco kiye Ajakanut mere,

⁴² di kiko uco gi i mac kodop kakame jo bino koko kede mwodo lak gi kiye.

⁴³ Di do jo opoore ko bino rieny bala ceng i Ajakanut ka Papa gi. Ngat kame tie kede yite wek ewinyi.

Agole me Abar kame Kokano

⁴⁴ “Ajakanut me malo cal bala abar kame kokano i poto, kame dano oudo di eko umo pi yomcuny adwong kame etie kede, en eko ot di eko cato gi dedede kame etie kede, di eko wilo kede poto nono.

Agole me Kidi me Wel

⁴⁵ “Doko Ajakanut me malo cal bala ngacat kame mo kide me wel;

⁴⁶ i kare kame eudo kede kidi acel me wel, en eko ot cato gi dedede kame oudo etie kede pi wilo kede kidi nono.

Agole me Bwoi

⁴⁷ “Doko da Ajakanut me malo cal bala bwoi kame oudo kouco i nam di eko mako deknam me epone dedede.

⁴⁸ Kakame oudo bwoi otieko pong kede, jo oko wane i dog nam, kiko bedo piny yero deknam abeco di kiketo i yi ebukit, do kiko uco areco mege tenge.

⁴⁹ Ebino timere kamanono da i ajikini me piny; imalaikan bino wok di kiko poko jokareco kikom jo kopoore,

⁵⁰ di kiko uco gi i mac kodop, kakame jo bino koko kede mwodo lak gi kiye.”

Pwony Anyen kede Acon

⁵¹ Yesu oko penyo gi be, “Itiekunu mam do niang gigi dedede?” Gin kiko dwoko ne be, “Ebo, oniang.”

⁵² En eko waco ne gi be, “Pi mano, ngaiwandik acelacel kame kotieko pwonyo kop i kom Ajakanut me malo cal bala won paco kame woto gi anyen kede acon ki kakame ekano iye jame mege.”

Jo me Nasaret Odagi Yesu

⁵³ Kakame Yesu otieko kede mino pwony i agole, en eko yai tenge ki kuno,

⁵⁴ di eko ot i bomba me tur gi, en eko cako pwonyo jo me kuno i sinagoga gi. Gin kiko uro di kiwaco be, “Icuo ni oudo rieko kede tice me twer gi ki tuai?

⁵⁵ Mam wot ka ngapac ine? Mam nying toto mere Maria? Imiegu mege en Yakobo, Yosepu, Simoni kede Yuda.

⁵⁶ Mam amiegu mege dedede tie karacel kede wa? Do do en eudo gigi dedede ki tuai?”

⁵⁷ Gin di do cuny gi oko dage. Do Yesu oko waco ne gi be, “Jo me kabedo dedede woro enabi, kwanyo jo me adul me tur gi kede jo me i ode.”

⁵⁸ En likame eko timo tice me twer kuno pien oudo gin ki li kede yei.