Matayo 11 - Baibuli I Leb Kumam 2013

Jo kame Yokana Ngaibatis Ooro

¹ Di do Yesu oudo otieko pwonyo josiao mege tomon kiwie are, en eko pororo ki kuno pi ot tuco kede pwonyo jo kop mere i bomban gi.

² Kakame Yokana owinyo kede di etie i otkol gikame Yesu otimo, en eko cwano josiao mege but Yesu

³ pi penye be, “In en ibedo ngat kame oudo kowaco be oyaro bino, arabo wan omeede daro dano ace?”

⁴ Yesu oko dwoko ne gi be, “Dokunu ikounu waco ne Yokana gikame wun iwinyunu kede kame inenunu:

⁵ wang imuduka oyabere, ingwalasa do twero ot, jo kame tie kede dobo ocango, idingoi da yit gi oyabere, koyaruno jo oto kede kotuco Kop Aber ne jocan.

⁶ Etie kede winyo ngat kalikame tie kede gung i koma.”

⁷ Kakame do josiao ka Yokana tie ot kede tenge, Yesu oko cako yamo ne ekodet kop i kom Yokana be, “I kare kame wun bin iotunu kede but Yokana i tim, oudo iotunu neno nyo? Benyo, oudo iotunu neno lagara kame yamo yayango?

⁸ Nyo kara ber kame wun oudo iotunu kuno pi neno? Benyo, iotunu neno ngat kame ngapo i goen acil? Li, pien jo kame ngapo igoen acil bedo i miere me abakai.

⁹ Do nyo kara ber kame wun oudo iotunu kuno neno? Benyo, oudo iotunu neno enabi? Ebo, doko awaco ne wu be ngat kame kalamo enabi en kame wun oudo iotunu neno.

¹⁰ Piento Yokana en kame iwandik kacil bin owaco kop i kome be, ‘Neni, atie cwano ngaor na geo ot nin anyim, kame bino iiko yongayo nin.’

¹¹ Ateteni awaco ne wu be, kikom jo dedede kame kotieko nywalo, likame tie ngatamoro kame pire dwong kalamo Yokana Ngaibatis. Do ngat kame titidi twatwal i Ajakanut me malo pire dwong kalamo Yokana.

¹² Cako i kare ka Yokana Ngaibatis tuno tin, Ajakanut me malo oudo kobedo kelo tetek, doko jo gero obedo game tetek.

¹³ Pien inabin dedede kede Iswil ka Musa bin omurao kop i kom Ajakanut tuno i kare ka Yokana;

¹⁴ aso ka itwerunu yei, Yokana inonono kame enabi bin owaco kop i kome i kare kame ewaco kede be Elia oyaro bino.

¹⁵ Ngat kame tie kede yite, wek ewinyi.

¹⁶ “Do abino poro jo me i kare ni kede nyo? Gin kical bala idwe kame tie bedo i atale, kame lwongo jo tuko wad gi di kiwaco ne gi be,

¹⁷ ‘Wan ogoo ne wu tum do likame imielunu, wan owololo ne wu koko kame okoko kede ngat oto, do ikounu dagi tururo.’

¹⁸ Pien Yokana bin obino di likame ecamo, kede di likame emato gimoro kame mero jo, do jo oko waco be etie kede jwogi.

¹⁹ Do Wot ka dano obino di ecamo kede di emato, doko jo oko waco be, ‘Nenunu icuo ni, en ebedo ngacam kede ngamera, doko en adieru me jorar esolo kede jodubo!’ Do di rieko ka Rubanga nyutere be etie kakare i tice mege.”

Bomban kame Dagi Yei

²⁰ Yesu oko cako bunano bomban kame bin esingo timo iye tice me twer, pien jo kame tie i yi gi oudo bin odagi swilaro. En ewaco be,

²¹ “Ibino neno can in Korasin! Ibino neno can ida Betesaida! Pien koto tice me twer kame kotimo i diere wun oudo bin kotimo i bomban me Taya kede Sidon, jo kame tie i yi gi oudo koto otieko swilaro sek di kingapo giangapa me iturur.

²² Do ango awaco ne wu be, i ceng me ngolo kop Rubanga bino nyuto kisa ne jo me Taya kede Sidon kalamo wun.

²³ Aso, in Kaperanaum, iparo be kobino tingi malo? Kobino dwoki piny i kabedo me jo oto. Pien koto tice me twer kame kotimo i diere nin oudo kotimo Sodoma, oudo koto pwodi etie cungo tuno tin.

²⁴ Do awaco ni be, i ceng me ngolo kop Rubanga bino bedo kede kisa i kom jo me Sodoma kalamo in.”

Bianu Buta ikounu Udo Wei

²⁵ Iesawa nono Yesu oko waco be, “Apwoyi, Papa, Rwot me malo kede me lobo, pien in ikano gigi kibut jorieko kede jo aniang, di iko nyuto gi ne idwe atino.

²⁶ Ebo Papa, manono en epone kame in oudo imito be etimere kede.

²⁷ “Papa na otieko mina gi dedede i cinga; likame tie ngatamoro kame ngeo Wod, kwanyo kenekene Papa, doko likame tie ngatamoro kame ngeo Papa, kwanyo kenekene Wod, kede jo kame Wod oyero pi nyuto ne gi Papa.

²⁸ “Bianu buta wun jo dedede kame ool kede kame yec odio, ango abino mino koru wei.

²⁹ Riongunu ayoko na ikounu pwonyere kibuta, pien ango awor doko amwol i cunya, di ikounu bino udo wei.

³⁰ Pien ayoko nango yoyot doko yec na wekeweke.”