Marako 9 - Baibuli I Leb Kumam 2013

¹ Di en eko waco ne gi be, “Ateteni awaco ne wu be, tie jo mogo kame nataman tie kan, kalikame bino bilo to tuno di kineno Ajakanut ka Rubanga obino kede twer.”

Cal ka Yesu Olokere

² Ingei ceng kanyape, Yesu oko kwanyo Petero, Yakobo kede Yokana, di eko tero gi malo i wi moru kargi ken gi. Kom Yesu oko lokere i wang gi kanono;

³ igoen mege oko doko tar liamaliam, kame ngatamoro i wi lobo kan likame twero lwoko gi di kiko lony kamanono.

⁴ Di gin kiko neno Elia kede Musa di tie yamo kede Yesu.

⁵ Petero oko waco ne Yesu be, “Apwony, eber pi wan bedo tie kan. Nan do wek oger kimere adek kan; acel ne in, acel ne Musa kede acel ne Elia.”

⁶ Petero oudo kwia gikame eyami, pien lworo oudo otieko mako gi kitek.

⁷ Edou oko umo gi pukupuk, di dwan oko wok ki edou di waco be, “Man en Woda kame amaro, winyenu.”

⁸ Kiko loko wang gi awakawaka di kingongolo piny, do likame kiko neno bobo ngatamoro ace, kwanyo Yesu kenekene.

⁹ Kakame oudo kitie wok kede ki wi moru, Yesu oko ciko gi be kur kiwac ne ngatamoro gikame kineno tuno di Wot ka dano oyaruno kikom jo oto.

¹⁰ Gin kiko yei mungo kop nono di kipenyere ken gi ken gi dwong me kop me yaruno kikom jo oto.

¹¹ Kiko penyo Yesu be, “Pinyo ber komio jopwony me Iswil waco be, miero Elia kong cak dwogo di pwodi gini likame otimere?”

¹² En eko dwoko ne gi be, “Ebo, ateteni Elia miero cak bino me wek eik gi dedede bobo. Do kara pinyo komio iwandik kacil waco be Wot ka dano bino neno can kitek di oko timo ne tim me lewic?

¹³ Do awaco ne wu be Elia otieko bino, di gin kiko timo ne gikame cuny gin oudo mito, bala kame iwandik kacil da waco i kome.”

Yesu Ocango Awobi kame tie kede Tipo Arac

¹⁴ Kakame kituno kede but josiao icegun, kiko neno ekodet me jo di oluko gi, di jopwony me Iswil tie piem kede gi.

¹⁵ Cucuto nono di ekodet dedede oneno Yesu, kiko uro twatwal di kiko ringo bute kiko mote.

¹⁶ Yesu oko penyo josiao mege be, “Kop nyo kame wun itienu piem iye kede gi?”

¹⁷ Ngat acel kikom ekodet oko dwoko ne be, “Apwony, ango akelo woda buti pien etie kede tipo arac kame genge yamo.

¹⁸ Ka tipo arac nono obino ne, rete piny di buo ko donyo wok ki doge, en eko donyo ngururo di emwodo lake, di do eko teregego. Ango oudo akwao josiao ni be koto kiriame tenge, do likame kiko twero.”

¹⁹ Yesu oko waco ne gi be, “Wun lwak kame li kede yei, miero abed kede wu pi kare arom amene? Abino kanyakino kede wu tuno awene? Kelenu buta kan.”

²⁰ Gin kiko tere but Yesu. Cucuto kakame tipo arac nono oneno kede Yesu, en eko mino kom awobi nono odonyo miel teltel di eko rete piny, di eko mine edonyo bebelo di buo mol ki doge.

²¹ Yesu oko penyo papa mere be, “Etieko nan kare arom amene di gini time kaman?” En eko dwoko be, “Kom cako di pwodi en atin.

²² Tien atot etieko rereto en i mac kede i pii di emito neke. Do ka itwero timo gimoro iye, tim wa kisa ikony wa.”

²³ Yesu oko dwoko ne be, “Pinyo komio iwaco na be, ka itwero? Jame dedede twerere ne ngat kame tie kede yei.”

²⁴ Cucuto papa me awobi nono oko kok be, “Ango atie kede yei; Okwe konya ikwany gungcuny tenge ki buta!”

²⁵ Kakame Yesu oneno kede be ekodet me jo oudo tie ringini cokere bute, en eko ciko tipo arac nono be, “In tipo kame dingo yit jo kede kame neko leb jo, aciki, wok tenge ki kome di kur iko dok bute bobo.”

²⁶ Tipo arac nono oko redo di eko mino kom awobi nono odonyo miel teltel, en eko wok. Awobi nono oko dong bala ngat otieko to; omio jo atot oko waco be, “Etieko do to!”

²⁷ Do Yesu oko mako cinge oko kiarao en, di eko yai malo.

²⁸ Di do Yesu otieko donyo i yi ot, josiao mege oko penye i mung be, “Pinyo komio wan likame oudo otwero riamo tipo arac nono?”

²⁹ Yesu oko dwoko ne gi be, “Likame tie gi ace kame twero riamo epone me tipo arac no, kwanyo ilega kenekene.”

Yesu Bobo Owaco kop kame mako To mere

³⁰ Yesu oko yai ki kuno kede josiao mege, kiko ot di kibeo ki Galilaya. Oudo likame emito be ngatamoro ngei kakame en etie iye,

³¹ pien oudo etie pwonyo josiao mege di ewaco ne gi be, “Kobino mino Wot ka dano i cing jo, di gin kiko bino neke. Do kame koneke, ingei ceng me adek en ebino yaruno.”

³² Do gin likame kiko niang kop mere nono, doko oudo kilworo penye.

Ngai en kame Pire Dwong Kalamo?

³³ Di do Yesu kede josiao mege oko tuno Kaperanaum. Kakame oudo kitie kede i ot, Yesu oko penyo josiao mege be, “Kara ber nyo kame oki wun itienu piem iye i yongayo?”

³⁴ Do gin likame kiko dwoko ne kop moro, pien gin oudo kibedo piem ken gi ken gi di kioto i yongayo, be ngai en kame pire dwong kalamo kikom gi.

³⁵ Yesu oko bedo piny, en eko lwongo josiao mege tomon kiwie are di eko waco ne gi be, “Ka ngatamoro mito bedo dano me agege, miero kong emwolere ebed dano me ajikini di en eko donyo tic ne jo dedede.”

³⁶ En eko kwanyo atin atitidi di eko mino ocungo i nyim gi, di eko tingo i kore di ewaco ne gi be,

³⁷ “Ngat kame gamo atin atitidi bala man i nyinga, udo egama, doko ngat kame gama, udo likame egamango, do udo egamo ngat kame oora.”

Ngat kalikame Dagi Wa udo en Merwa

³⁸ Yokana oko waco ne Yesu be, “Apwony, wan oko udo ngatamoro da di tie riamo jwogi i nyingi, do wan oko genge, piento en likame ebedo ngat acel kikom wa.”

³⁹ Yesu oko dwoko ne gi be, “Kur igengenu, pien likame tie ngatamoro kame timo tic me twer i nyinga, kame bino lokere awakawaka waco kope areco i koma.

⁴⁰ Pien ngat kalikame dagi wa udo en merwa.

⁴¹ Ateteni awaco ne wu be, ngat kame mio wu pii me amata pien wun ibedunu jo ka Kirisito, likame ebino kei giamia mere me pwoc kibut Rubanga.

Atama kame mio Dano Dubo

⁴² “Ngat kame mio acel kikom jo atino kame oyei ango gi dubo, oudo koto bedo ber ka kotweo ne kidi me riego i ngute di oko uce i nam.

⁴³ Aso, ka cingi en kame mi idubo, ngole tenge; pien eber ne in donyo i kuo kame bedo nakanaka abongo cingi acel, akaka bedo kede gin are dedede di iko ot i mac kalikame to, i mac kalikame nekere.

⁴⁴ (Pien kudilinge kame camo gi ki kuno likame to, doko mac mere bedo nakanaka.)

⁴⁵ Doko ka tieni en kame mi idubo, ngole tenge, pien eber ne in donyo i kuo kame bedo nakanaka abongo tieni acel, akaka bedo kede tieni are dedede di oko uci i mac kalikame to.

⁴⁶ (Pien kudilinge kame camo gi ki kuno likame to, doko mac mere bedo nakanaka.)

⁴⁷ Doko ka wangi en kame mi idubo, gole ooko, pien eber ne in donyo i Ajakanut ka Rubanga abongo wangi acel, akaka bedo kede wangi are dedede di oko uci i mac kalikame to.

⁴⁸ Pien kudilinge kame camo gi ki kuno likame to, doko mac mere bedo nakanaka.

⁴⁹ “Pien kobino lonyo ngat acelacel kede mac bala kite kame koketo kede kado i cam.

⁵⁰ “Kado ber, do ka tuto odoko bot, kotwero bobo mine edoko kec benyo? “Bedunu bala kado, di itienu kede mulem i diere wu kenu kenu.”