Marako 7 - Baibuli I Leb Kumam 2013

Pwony me Joakwari

¹ Iparisayon kede jopwony me Iswil mogo kame oudo owok ki Yerusalem oko cokere karacel but Yesu.

² Gin kiko neno di josiao ka Yesu mogo camo kede cing gi komunaun, dwong mere be gin oudo likame kilwoko cing gi bala kame bin itok gi mito.

³ (Pien Iparisayon karacel kede Iyudayan dedede oudo lubo pwony kame bin kigamo kibut joadongo gi. Gin bin likame kigeo cam kwanyo di kilwoko cing gi iepone kame bin itok gi mito kede.

⁴ Doko da kame kidwogo ki atale, oudo likame kicamo gimoro di pwodi likame kilonyere. Doko oudo kilubo itok apat atot bala me lwoko ikopon, agune kede bakulin.)

⁵ Di Iparisayon kede jopwony me Iswil oko penyo Yesu be, “Pinyo komio josiao nin likame lubo itok me joakwari wa, do kicamo kede cing gi komunaun?”

⁶ Yesu oko dwoko ne gi be, “Isaya bin omurao kop me ateni i kom wun joecuke, bala kite kame kowandiko kede be, “‘Jogi wora kede dog gi, do cuny gi bor kibuta;

⁷ kiwora wor me nono, pien gin kipwonyo iswilia ka dano ineno bala kidoko mega.’

⁸ “Wun iwekunu gwoko cik ka Rubanga, di ikounu lokere lubo itok me jo.”

⁹ Doko Yesu oko meede waco ne gi be, “Wun itienu kede yore me rieko me dagi lubo cik ka Rubanga tetekeny ilubunu itok wu.

¹⁰ Pien Musa bin owaco be, ‘Wor papa ni kede toto ni’; kede be, ‘Miero nek dano kame waco kop arac i kom papa mere arabo toto mere.’

¹¹ Do wun ipwonyunu be ka dano owaco ne papa mere amoto toto mere be, ‘Gikame oudo koto iudo kibuta obedo Koroban’ (kame dwong mere be, giamia but Rubanga),

¹² wun do ikounu yei ne weko konyo papa mere amoto toto mere.

¹³ Manono mio kop ka Rubanga kony mere doko li pi itok kame wun ipwonyunu. Doko da tie jame apat atot acal kamanoni kame wun itimunu.”

Gikame Pwoko Dano

¹⁴ Yesu bobo oko lwongo jo bute di eko waco ne gi be, “Winyunu wun dedede gikame atie waco ne wu di ikounu niang iye.

¹⁵ Likame tie gimoro kame dano mwonyo i yie kame mie emunaun, do gikame wok ki cuny dano en kame munao en.”

¹⁶ (Ngat kame tie kede yite, wek ewinyi.)

¹⁷ Di bin Yesu oyai oweko jo, en eko dok paco; josiao mege oko penye pi gonyo dwong me agole noni.

¹⁸ Yesu oko dwoko ne gi be, “Mam wuda iliunu kede niang? Likame inenunu be gikame donyo i yi dano likame karuno munao en,

¹⁹ pien udo likame edonyo i cunye, do edonyo i yie di en eko pelao ooko.” (Pi mano, Yesu otuco kakaler be cam dedede beco, likame kimunao dano.)

²⁰ Di bobo en eko waco ne gi be, “Gikame wok ki yi dano en kame munao en.

²¹ Pien ki cuny dano, en kame wok kiye par areco me caro, kuwo, nek,

²² adote, ingobel, kede timo gikareco dedede apat bala angalo, mit me lewic, nyeko, dubo nying jo, ewaka kede tim me mingomingo.

²³ Gikareco nogi dedede wok ki cuny dano di kiko munao en.”

Yei me Dako me Poenisia

²⁴ Di Yesu oko yai eko ot i adulion kame bomban me Taya kede Sidon tie iye, en eko udo ot kuno di eko donyo bedo iye. En oudo likame emito be ngatamoro ngei be etie kuno, do di oudo likame ekaruno mungere.

²⁵ Dako moro kame nyare oudo tie kede tipo arac oko winyo kop i kom Yesu, cucuto dako nono oko ot bute di oko riebere piny i tiene.

²⁶ Dako nono oudo likame obedo Ayudayat, do en oudo ebedo anywali me Poenisia, kame tie i piny me Siria. En eko bako ne Yesu doge pi riamo jwogi tenge ki kom nyare.

²⁷ Do Yesu oko dwoko ne be, “Wek ber kong mi idwe cam, pien likame eber cako kwanyo cam me idwe iko uco ne igwogin.”

²⁸ Do en eko dwoko ne be, “Ebo Rwot, do igwogin kame buto i dud emesa da camo angidingidin me cam kame idwe rereto ki wi emesa.”

²⁹ Yesu oko waco ne be, “Pi kop kame idwoko na no, dok do paco, ibino udo di jwogi otieko weko nyari.”

³⁰ Dako nono oko dok paco en eko udo nyare tie buto i apien di jwogi otieko yai oweke.

Yesu Ocango Edingo kame Lebe Oto

³¹ Yesu oko yai ki adul me Taya eko beo ki Sidon, di en eko pelao ki Dekapoli tuno i nam me Galilaya.

³² Jo mogo oko kelo lomoro bute kame yite oding, doko di likame etwero yamo da, di kiko bako ne Yesu dog gi be eket cinge i wie di en eko cange.

³³ Yesu oko tero icuo nono tenge me ekodet eko rwako lwete i yi yite, di eko ngulo lau eko mulo kede lebe.

³⁴ Di do Yesu oko neno malo en eko oomo wei di en eko waco ne be, “Epata”, dwong mere be, “Yabere.”

³⁵ Cucuto yit icuo nono oko tuc, lebe da oko gonyere, di en eko cako yamo kiber.

³⁶ Yesu oko waco ne jo be kur kiwac ne ngatamoro kop nono. Do akadi bed bala en eciko gi kamanono, gin kiko meede ameda sarakino kop nono.

³⁷ Jo dedede kame bin owinyo kop noni oko bedo kede ur kalikame wacere di kiwaco be, “En etieko timo gi dedede kiber, etie mino idingoi winyo kop, kede jo kame leb gi oto da geo yamo.”